နို၀င်ဘာ ၂၂၊၂၀၂၅
Zalen
ချင်းပြည်နယ် ၊ မင်းတပ်မြို့ နယ်အနောက်ခြမ်း တစ်နေရာကို ယနေ့ နေ့လယ် (၃:၀၀)နာရီ၀န်းကျင်မှာ စစ်ကောင်စီက လေကြောင်းကနေ ဗုံးကြဲတိုက်ခိုက်ခဲ့တယ်လို့ ဒေသခံ တွေထံမှ သိရပါတယ်။
အဆိုပါလေကြောင်းတိုက်ခိုက်မှုမှာ မင်းတပ် – မတူပီ လမ်းမပေါ်ကို စစ်ကောင်စီက ဂျက်ဖိုက်တာနဲ့ သုံး ကြိမ် ဆက်တိုက် ဗုံးကြဲ ပစ်ခတ်ခဲ့တာကြောင့် ထိခိုက်ပျက်စီးမှု အချို့ရှိတယ်လို့ဆိုပါတယ်။
အဲဒါနဲ့ပတ်သက်လို့ ဒေသခံအမျိုးသမီးတစ်ဦးကတော့ ” ၂၂ မိုင်လမ်းခွဲကိုကြဲတာ။ လူနေအိမ် တွေထိလို့ ပျက်စီးတာတွေရှိတယ်။ အိမ်ဘေးနားရပ်ထားတဲ့ ကားလည်းထိတယ်ပြောတယ်”လို့ Zalen ကိုပြောပါတယ်။
အကြမ်းဖက်စစ်ကောင်စီက လေကြောင်း ကနေ ပွိုင့်ဖိုက်တွေနဲ့လည်း ပစ်ခတ်မှု တွေပြုလုပ်တာကြောင့် မင်းတပ် – မတူပီ လမ်းမကြီး အချို့နေရာတွေလည်း ပျက်စီးမှုရှိတယ်လို့ သူမက ဆက်ရှင်းပြပါတယ်။
ပြီးခဲ့တဲ့ အောက်တိုဘာလတုန်းက မြို့မရဲစခန်းဟောင်းအနီး ခေါနူးရိပ်သာကို စစ်ကောင်စီကလေကြောင်းကနေ နှစ်ရက်ဆက်တိုက်ပစ်ခတ်ခဲ့လို့ စစ်သုံ့ပန်း နှစ်ဦး အပါအဝင် လေး ဦးထိခိုက်ဒဏ်ရာရခဲ့ပါတယ်။
သတင်း – မိုးပီအောင်
ဓာတ်ပုံ – HKL
