ကန်ပက်လက်မြို့နယ် ကျင်ဒွေးကျေးရွာအုပ်စု ကျေးရွာ(၄)ရွာပေါင်းပြီး ကျင်ဒွေးမြို့အဖြစ် ဒီဇင်ဘာ (၁၄)ရက်မှာ နိုင်ငံတော်သမ္မတရုံး ရဲ့ နိုင်ငံရေးနှင့် လုံခြုံရေးဌာနကြီးက စာအမှတ်၊ ၅၀၈(၅၁)/၁၂ နဲ့အတည်ပြုထုတ်ပြန်လိုက်ပါတယ်။
ကျင်ဒွေးကျေးရွာအုပ်စုရှိ ကျေးရွာ (၄)ရွာအား စုစည်းပြီး ရပ်ကွက်(၄)ရပ်ကွက်ပါဝင်သော ကျင်ဒွေးမြို့အဖြစ်တိုးချဲ့ဖွဲ့စည်းပြီး ကျန်ရှိသော ကျေးရွာ (၂)ရွာကို အောက်လှယ်ကျေးရွာအုပ်စုအဖြစ် အမည်ပြောင်းလဲဖွဲ့စည်းထားပါတယ်။
ကျင်ဒွေးကျေးရွာအုပ်စုထဲမှာ ဖုန်းတွီတင်ရွှာ၊ ထန်းကုန်ရွာ၊ ဟုပ်ဖုန်ကျင်းရွာ၊ ကျင်ဒွေးရွာဟောင်း စသည်တို့ပါဝင်ပါတယ်။ ကျင်ဒွေးကျေးရွာဟာ ကန်ပက်လက်နဲ(၅၇)မိုင်လောက်ပြီး တစ်အုပ်စုလုံးတွင် အိမ်ခြေ (၂၀၀-၃၀၀)ခန့်ရှိပါတယ်။
ကန်ပက်လက်မြို့နယ် ကျင်ဒွေးရွာကို မကြာမီမြို့အဆင့်တိုးမြှင့်ပေးမယ်လို့ နိုင်ငံတော်အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်က ၂၀၁၈ ခုနှစ် အောက်တိုဘာ(၂၆)ရက်က ကန်ပက်လက်မြို့လာရောက်စဉ် ကတိပေးထားပါတယ်။
ကန်ပက်လက်မြို့နယ် NLD ပါတီဥက္ကဌ ဦးထန်းမနားလိုင်းက “ကျင်ဒွေးရွာဟာ ကန်ပက်လက်မြို့နယ်ရဲ့ စီးပွားရေးအချက်အချာအကျဆုံးနေရာဖြစ်သလို လူဦးရေးလည်းများဆုံးရှိတဲ့ရွာလည်းဖြစ်တယ်။ ပြီးတော့ သူက မင်းတပ်၊ ပလက်ဝ၊ မတူပီမြို့နယ်တွေနဲ့ထိစပ်နေတာကြောင့် စီးပွားရေးလမ်းကြောင်းကြီးတစ်ခုဖြစ်တယ်”လို့ပြောပါတယ်။
ကျင်ဒွေးရွာဟာ ၁၉၇၀ ခုနှစ်ဝန်းကျင်တွင်မြို့ဖြစ်ခဲ့သော်လည်း ၁၉၇၄ အခြေခံဥပဒေကြောင့် ရွာအဆင့်လျော့ကျသွားပါတယ်။
ချင်းပြည်နယ်ဟာ မြို့နယ်(၉)မြို့နယ်နဲ့ မြို့(၉)မြို့ ဖြစ်လာပါပြီ။ တီးတိန်မြို့နယ်မှာ ခိုင်ကမ်းမြို့၊ တွန့်ဇံမြို့နယ်တွင် ကျီးခါးမြို့၊ ဖလမ်းမြို့နယ်မှာ ရိခေါ်ဒါရ်မြို့၊ ဝေဘူလမြို့၊ ထန်တလန်မြို့နယ်တွင် နှရိန်းမြို့၊ မတူပီမြို့နယ်တွင် လိုင်လဲပီမြို့၊ ရေဇွာမြို့၊ ကန်ပက်လက်မြို့နယ်တွင် ကျင်ဒွေးမြို့၊ မင်းတပ်မြို့နယ်တွင် မကွီအိမ်နူးမြို့၊ ပလက်ဝမြို့နယ်တွင် ဆမီးမြို့ စသည်တို့ပါဝင်ပါတယ်။
