တပ်မတော်သားလွှတ်တော်ကိုယ်စားလှယ်ကို ၂၀၃၀ ခုနှစ်တွင် ငါးရာခိုင်နှုန်းထိလျော့ချရန် ဒီချုပ်ပါတီက အကြံပြုထားပြီး တိုင်းရင်းသားပါတီအချို့က ပယ်ဖျက်ရန်လိုလား
ပြည်သူတွေရွေးကောက်ခံမဟုတ်ဘဲ လွှတ်တော်ခန်းမထဲမှာထိုင်နေတဲ့ တပ်မတော်သား ၂၅ ရာခိုင်နှုန်းကို ဒီချုပ်ပါတီက ၂၀၃၀-၃၅ သက်တမ်းတွင် ငါးရာခိုင်နှုန်းထိ တဖြည်းဖြည်းလျော့ချရန်အကြံပြုထားပြီး တိုင်းရင်းသားပါတီအချို့က တခါထဲပယ်ဖျက်ရန်အကြံပြုထားပါတယ်။
၂၀၀၈ ဖွဲ့စည်းပုံအခြေခံဥပဒေ ပုဒ်မ ၁၄ တွင် ပြည်ထောင်စုလွှတ်တော်၊ တိုင်းဒေသကြီးလွှတ်တော်နှင့် ပြည်နယ်လွှတ်တော်များတွင် လွှတ်တော်ကိုယ်စားလှယ်များအဖြစ် ဤဖွဲ့စည်းပုံအခြေခံဥပဒေအရ သတ်မှတ်သည့်ဦးရေအတိုင်း တပ်မတော်ကာကွယ်ရေးဦးစီးချုပ်က အမည်စာရင်းတင်သွင်းသည့် တပ်မတော်သားများပါဝင်သည်လို့ဖော်ပြထားပါတယ်။
ယင်းပုဒ်မနဲ့ပတ်သက်ပြီး အမျိုးသားဒီမိုကရေစီအဖွဲ့ချုပ်ပါတီက ပြည်ထောင်စုလွှတ်တော်၊ တိုင်းဒေသကြီးလွှတ်တော်နှင့် ပြည်နယ်လွှတ်တော်များတွင်လွှတ်တော် ကိုယ်စားလှယ်များအဖြစ် ပြည်ထောင်စုလွှတ်တော် ၂၀၂၀-၂၅တတိယအကြိမ်သက်တမ်းတွင် ကိုယ်စားလှယ်ဦးရေ စုစုပေါင်း၏ တစ်ဆယ့်ငါး ရာခိုင်နှုန်း၊ ၂၀၂၅-၃၀စတုတ္ထအကြိမ်သက်တမ်းတွင် ကိုယ်စားလှယ်ဦးရေစုစုပေါင်း၏ တစ်ဆယ်ရာခိုင်နှုန်း၊ ၂၀၃၀-၃၅ ပဉ္စမအကြိမ်သက်တမ်းတွင် ကိုယ်စားလှယ်ဦးရေ စုစုပေါင်း၏ ငါးရာခိုင်နှုန်း တပ်မတော်ကာကွယ်ရေးဦးစီးချုပ်က အမည်စာရင်းတင်သွင်းသည့်တပ်မတော်သားများပါဝင်သည်လို့အကြံပြုထားပါတယ်။
ဒါပေမယ့် ရခိုင်အမျိုးသားပါတီ၊ ရှမ်းတိုင်းရင်းသားများဒီမိုကရေစီအဖွဲ့ချုပ်ပါတီ၊ မွန်အမျိုးသားပါတီ၊ အမျိုးသားညီညွှတ်သော ဒီမိုကရက်တစ်ပါတီတို့ကတော့ ပယ်ဖျက်ရန် အကြံပြုထားပါတယ်။
ဒါ့ပြင် တအောင်း(ပလောင်)အမျိုးသားပါတီက နှစ်ကာလ သတ်မှတ်ရန် နဲ့ ပအိုဝ်းအမျိုးသားအဖွဲ့ချုပ်ပါတီက အခြေအနေနှင့်အချိန်အခါအပေါ်မူတည်၍ နိုင်ငံရေးမှ စွန့်ခွာရမည်လို့အကြံပြုထားပါတယ်။
