၁၃၊ဒီဇင်ဘာ၊၂၀၂၃
Zalen
ပဲခူးတိုင်း၊ဖြူးမြို့နယ် ရန်ကုန်-မန္တလေးလမ်းမပေါ်မှာရှိတဲ့ ညောင်ပင်သာရဲစခန်းကို ကရင်အမျိုးသား လွတ်မြောက်ရေးတပ်(KNLA)၊ပြည်သူ့ကာကွယ်ရေးတပ်မတော်(PDF)နဲ့ ဗမာပြည်သူ့လွတ်မြောက်ရေးတပ်မတော်(BPLA)တို့ပူးပေါင်းတပ်ဖွဲ့များက ယနေ့ ဒီဇင်ဘာ ၁၃ရက်နေ့ မနက်မှာ တိုက်ခိုက်သိမ်းခဲ့တယ်လို့BPLAကထုတ်ပြန်ထားပါတယ်။
အင်အား ၆၀ခန့်ရှိတဲ့ညောင်ပင်သာရဲစခန်းကို ပူးပေါင်းတပ်ဖွဲ့များက ယနေ့မနက် ၅နာရီခိုက်မှာ တိုက်ခိုက်ခဲ့တာဖြစ်ပြီး စစ်ကောင်စီတပ်ဖွဲ့ဝင် ၁၀ထက်မနည်း သေဆုံးခဲ့ကာ ကာကွယ်ရေးပူးပေါင်းတပ်ဖွဲ့ဘက်မှ BPLAတပ်ဖွဲ့ဝင် ၄ဦးသာ ထိခိုက်ဒဏ်ရာရရှိခဲ့ပြီး ၎င်းတို့ထဲက တစ်ဦးကျဆုံးသွားတယ်လို့သိရပါတယ်။
တိုက်ပွဲအပြီး သေနတ် ၁၃လက်၊RPG ထိပ်ဖူး ၂၁လုံး၊RPG ပို့ယမ်း ၁၇ခု၊လက်နက်ကြီးလက်နက်ယ်ကျည်နဲ့ ခဲယမ်းများ၊စစ်အသုံးဆောင်ပစ္စည်းများကို ပူးပေါင်းတပ်ဖွဲ့များက သိမ်းဆည်းရမိခဲ့တယ်လို့လည်းဆိုပါတယ်။
ယမန်နေ့ ဒီဇင်ဘာ၁၂ရက်နေ့မှာလည်း ရွေကျင်မြို့နယ်ရှိ ကွန်ဖဲ့စခန်းကို BPLAကသွားရောက်တိုက်ခိုက်ခဲ့ရာ စခန်းရှိစစ်ကောင်စီတပ်သားများဟာ စခန်းကိုစွန့်ခွါထွက်ပြေးသွားခဲ့တာကြောင့် စခန်းကိုအလွယ်သိမ်းပိုက်ရရှိနိုင်ခဲ့တာလည်းဖြစ်ပါတယ်။
BPLA တပ်ဖွဲ့ဟာ တောင်ပိုင်း အမှတ် ၁၀၇စစ်ဒေသနှင့်မြောက်ပိုင်း အမှတ် ၂၀၇စစ်ဒေသတို့မှာ မဟာမိတ်များနဲ့တူတကွ စစ်ကောင်စီများကို ပူးပေါင်းတိုက်ခိုက်နေတယ်လို့လည်း BPLAကအသိပေးထားပါတယ်။
HAK
