ချင်းပြည်နယ် ၊ မတူပီမြို့အခြေစိုက် စစ်ကောင်စီတပ်သား ၇ ဦးခန့်ဟာ လက်နက်အပြည့်အစုံဖြင့် ဒီဇင်ဘာလ ၁၄ ရက်နေ့နဲ့ ထွက်ပြေးသွားကြောင်း စစ်တပ်ဖက်က လာသော သတင်းအရင်းအမြစ်များရ သိရပါတယ်။
စစ်ကောင်စီတပ်သား ၇ ဦးခန့် ထွက်ပြေးသွားကြောင်း ဆိုသော်လည်း အရေအတွက် အတိအကျကိုတော့ မသိရသေးပါဘူး။ တစ်ချို့ကတော့ စစ်သား ၄ ဦးနှင့် ရဲ ၂ ဦး လက်နက်အပြည့်အစုံအပြင် RPG လောင်ချာကိုလည်း ယူသွားကြကြောင်းလည်း သတင်းများထွက်နေပါတယ်။
ဒီလို သတင်းထွက်လာပြီးနောက် မတူပီမြို့တွင် ကောင်စီတပ်သားများဟာ ဒီဇင်ဘာလ ၁၄ ရက်နေ့ကစပြီး မြို့အနီးအနားတစ်လျှောက် ရုပ်ရုပ်သဲသဲဖြင့် ရှာဖွေမှုများ လုပ်ဆောင်နေပြီး လက်နက်ကြီး၊ လက်နက်ငယ်များကိုလည်း ပစ်ခတ်နေကြကြောင်း သိရပါတယ်။ ထို့အပြင် မတူပီမြို့အတွင်း အဝင်အထွက်ကိုလည်း ၃ ရက်အထိ ပိတ်မည်ဟုလည်း သတင်းရရှိပါတယ်။
မတူပီမြို့အဝင်အထွက်ကို ပိတ်လိုက်သောကြောင့် ပခုက္ကူကနေ မတူပီမြို့ကို ကားဖြင့် ပြန်လာကြသော ခရီးသည်များဟာ လည်မျိုမြစ်တွင် ပိတ်မိနေကြောင်း၊ မနေ့ညတွင် အလွန်ချမ်းသောကြောင့် ချန်းပြန်းရွာသို့ ဝင်အိပ်ရင်း မီးလှုံခဲ့ကြသော်လည်း စစ်ကောင်စီတပ် ခလရ ၃၀၄ ကနေ လက်နက်ကြီးများဖြင့် ပစ်ခတ်ခဲ့သောကြောင့် တောထဲကိုထွက်ပေးခဲ့ကြကြောင်း ဆိုပါတယ်။
