တွန်းဇံမြို့နယ်တွင် ကိုယ်ဝန်ဆောင်နဲ့ ၂နှစ်အောက်ကလေးထောက်ပံ့ငွေ အပြည့်အဝမရဟုဆို
တွန်းဇံမြို့နယ်၊ Sialthawzang (ကျောက်ချပ်)ရွာတွင် ကိုယ်ဝန်ဆောင်နဲ့ ၂ နှစ်အောက်ကလေးထောက်ပံ့ငွေကို (၇)လစာ အပြည့်အဝမရကြဘူးလို့ ယင်းထောက်ပံ့ငွေတိုင်ကြားရေးတာဝန်ခံထံမှသတင်းရရှိပါတယ်။
ချင်းပြည်နယ်တွင် ကိုယ်ဝန်ဆောင်နဲ့ ၂ နှစ်အောက်ကလေးငယ်တွေကို တစ်ယောက်လျှင် တစ်လ တစ်သောင်းခွဲနှုန်းထောက်ပံ့ပေးနေပါတယ်။
ကျေးရွာတိုင်ကြားရေးတာဝန်ခံ ဒေါ်ဆန်သဲက “ဒီထောက်ပံ့ငွေကို ကျေးရွာအုပ်ချုပ်ရေးမှူးနဲ့ စာရေးက ပေးတာ။ စာထဲမှာတော့ နှစ်လစာ တစ်ယောက် သုံးသောင်းလို့ရေးထားပေမယ့် တကယ်ရတာက နှစ်သောင်းပဲရတယ်။ အခုလိုဖြစ်တာ တော်တော်များနေပြီ။ မြို့နယ်ကိုလည်း တိုင်တာတော်တော်များနေပြီ။ မြို့နယ်ကနေ လာစစ်ပေမယ့် သိပ်အရာမရောက်ဘူး။ ၂၀၁၉ ခုနှစ် စက်တင်ဘာ ၅ ရက်မှာ ဇွန်-ဇူလိုင်လတွက်ထုတ်ပေးတယ်။ အဲ့ဒီမှာ ကလေး ၄ ယောက်က ဇူလိုင်လမှာ ၂ နှစ်ပြည့်မှာ။ သူတို့ကို ကျေးရွာအုပ်ချုပ်ရေးမှူးတွေက ၂ နှစ်ပြည့်သွားလို့မထုတ်ပေးနိုင်ဘူးဆိုပြီးမပေးဘူး။ မြို့နယ်ကိုတင်ပြတော့ သူတို့တွက်လည်း ငွေထုတ်ပေးထားတယ်သွားထုတ်ပါစေလို့ပြောပေမယ့် သူတို့ကမထုတ်ပေးဘူး” လို့ပြောပါတယ်။
Sialthawzang (ကျောက်ချပ်)ရွာတွင် ကိုယ်ဝန်ဆောင်၊ ၂ နှစ်အောက်ကလေးငယ် ၄၀ ခန့်ရှိပါတယ်။ ၂၀၁၇ ခုနှစ် အောက်တိုဘာ ၂၂ ရက်တွင် မေလ နဲ့ဇွန်လ နှစ်လစာအတွက် တစ်ယောက် ၃ သောင်းရဖို့ ၂ သောင်းပဲရရှိကြပါတယ်။ ၂၀၁၈ ခုနှစ် ဇန်နဝါရီလ ၉ ရက်မှာ ဇူလိုင်-သြဂုတ်-စက်တင်ဘာ-အောက်တိုဘာ ၄ လစာအတွက် ၆ သောင်းရဖို့ ၃၀ သောင်းပဲရကြပါတယ်။ ၂၀၁၈ ခုနှစ် နိုင်ဝင်ဘာ ၇ ရက်မှာ ၃ သောင်းရဖို့ ၂ သောင်းပဲရကြတယ်လို့ တိုင်ကြားရေးတာဝန်ခံကပြောပါတယ်။
ဒီကိစ္စနဲ့ပတ်သက်ပြီး Sialthawzang (ကျောက်ချပ်)ရွာ အုပ်ချုပ်ရေးမှူး ဦးကမ်ခင့်ကို မေးမြန်းရာ “အားလုံးရကြပါတယ်။ ဘာမှပြဿနာမရှိပါဘူး” လို့ပြောပါတယ်။
ချင်းပြည်နယ်လူမှုဝန်ထမ်းဦးစီးဌာန ညွှန်ကြားရေးမှူး ဦးအေးမင်းညွှန့်က “၂၀၁၇ နဲ့ ၂၀၁၈ ခုနှစ်ကဖြစ်တဲ့ကိစ္စတော့ ထောက်ပံ့ငွေပြန်ရအောင်လုပ်ပေးလို့မရတော့ဘူး။ အဲ့ငွေတွေအကုန်လုံးပြန်အပ်ထားပြီလေ။ ထောက်ပံ့ငွေလာမထုတ်ရင်တော့ အဲ့ငွေကိုပြန်အပ်ပြီးနောက်တစ်ကြိမ်ထောက်ပံ့ကြေးမှာပြန်သုံးရတယ်။ ၂၀၁၉ မှာဖြစ်တဲ့ကိစ္စတော့ ကျနော်တို့ပြန်စိစစ်ပြီး ရအောင်လုပ်ပေးလို့ရတယ်။ မြို့နယ်တွေကိုလည်းအကြောင်းကြားထားမယ်” လို့ဆိုပါတယ်။
