ဧပြီ ၂၃၊ ၂၀၂၆
Zalen
ချင်းပြည်နယ်၊ ပလက်ဝမြို့နယ်အထက်ပိုင်း မီးဇာကျေးရွာကို စစ်ကောင်စီတပ်က လေကြောင်းကနေ ဗုံးကြဲတိုက်ခိုက်မှုထပ်မံပြုလုပ်ခဲ့တယ်လို့ ဒေသခံတွေဆီက သိရပါတယ်။
ယမန်နေ့ ဧပြီလ ၂၂ ရက်နေ့မှာ စစ်ကောင်စီတပ်က မီးဇာကျေးရွာကို ဗုံးသီး အလုံးရေ ၅၀ ထက်မနည်း လေကြောင်း ဗုံးကြဲတိုက်ခိုက်ခဲ့တာဖြစ်တယ်လို့ သိရပါတယ်။
“ဗုံးကြဲတာက ဟုတ်ပါတယ်။ ရွာဘေးပတ်လယ်ကို ဗုံးကြဲသွားတာပါ။ ဗုံးသီးအလုံးရေ ၅၀ လောက်က ရှိမယ်။”လို့ ပလက်ဝမြို့နယ်ဒေသခံတဦးက ပြောပါတယ်။
အဲဒီလေကြောင်း တိုက်ခိုက်မှုကြောင့် လူထိခိုက်မှုနဲ့ နေအိမ်ပျက်စီးမှုအခြေအနေ အသေးအစိတ်ကို အတည်ပြုနိုင်ဖို့ ဆက်လက်စုံစမ်းနေဆဲဖြစ်ပါတယ်။
ပလက်ဝမြို့နယ်မှာ စစ်ကောင်စီက တိုက်ပွဲမရှိပေမဲ့ လေကြောင်း ဗုံးကြဲတိုက်ခိုက်မှုတွေ ဆက်တိုက်ပြုလုပ်နေပါတယ်။
ပြီးခဲ့တဲ့ မတ်လ ၂၉ ရက်နေ့ကလည်း ပလက်ဝမြို့နယ်၊ ကြောင်ချောင်းကျေးရွာကို စစ်ကောင်စီတပ်က ဂျက်ဖိုက်တာ၂စီးနဲ့ ဗုံးကြဲတိုက်ခိုက်ခဲ့ပါတယ်။
အဲ့အဲ့ဒီ ဗုံးကြဲ တိုက်ခိုက်မှုကြောင့် ကလေးငယ်တဦးအပါအဝင် အရပ်သား ၄ ဦး ဒဏ်ရာရရှိခဲ့ပြီး ၆ ဦးမှာ ပွဲချင်းပြီး သေဆုံးခဲ့ရပါတယ်။
သတင်း-ခူမီး
