၇၊ ဩဂုတ် ၂၀၂၄
Zalen
စစ်ကိုင်းတိုင်း၊ တမူးမြို့မှာ ဓာတ်ဆီဈေး ၄၂၀၀၀ ထိမြင့်တက်နေတာကြောင့် ဒေသခံများအခက်တွေ့နေတယ်လို့ ဒေသခံများက ပြောပါတယ်။
” ဓာတ်ဆီဈေးက တစ်ဂါလံ ၄၂၀၀၀ကျပ်ထိ ပေးဝယ်နေရပြီ။ သွားလာရေးက ဆိုင်ကယ်နဲ့ သွားရတာဆိုတော့ ဓာတ်ဆီဝယ်ထည့်ဖို့က မတတ်နိုင်ကြတော့ဘူး။ အလုပ်သွားတာတို့ ဈေးရောင်းထွက်ဖို့ဆို ဆီ ဈေးကြီးတော့ ကိုယ်ရောင်းတဲ့ ကုန်စိမ်းနဲ့ အခြားကုန်ပစ္စည်းတွေကိုဈေးတင်ရောင်းရတော့တာ။ အလုပ်ကိုင်ကရှားပါးတော့ လယ်တို့ စိုက်ခင်းတို့ သွားဖို့ကလည်းမလွယ်တော့ဘူးဗျ။ ကြာလာရင် စက်ဘီးပဲ နှင်းရတော့မယ့် ဘဝရောက်နေပြီ”လို့ ဒေသခံ တစ်ဦးက Zalen ကိုပြောပါတယ်။
တမူးမြို့မှာ လုပ်ငန်းအချို့ ရပ်ဆိုင်းထားတာကြာနေပြီဖြစ်တာကြောင့် ကားကြီးတွေမထွက်လို့ သုံးဘီး၊ ဆိုင်ကယ် များကို အဓိကထား အသုံးပြုနေတာကြောင့်နဲ့ ဆီဆိုင်တွေမှာ ဓာတ်ဆီ ထပ်ရောက်မလာပဲ လက်ကျန်ဆီများသာ ရောင်းချပေးနေရလို့ အခုလို ဓာတ်ဆီဈေး အဆမတန် မြင့်တက်နေတာလို့ ဆီဆိုင်များနဲ့ နီးစပ် သူတစ်ဦးထံမှ သိရပါတယ်။
အိန္ဒိယ-မြန်မာနယ်စပ် တမူးမြို့မှာ မြန်မာငွေဈေး အဆမတန်ကျဆင်းနေတာကြောင့် ကုန်ဈေးနှုန်းလည်း အဆမတန်မြင့်တက်နေပြီး အိန္ဒိယ ရူပီး ၁၀၀ ကို မြန်မာငွေ ၅၆၀၀ကျပ်ထိ မြင့်တက်နေပြီး မြန်မာငွေနဲ့ အိန္ဒိယ ကုန်ပစ္စည်း ရူပီး ၁၀၀ တန်ကို မြန်မာ ငွေနဲ့ ၆၀၀၀ ထိပေးဝယ် နေရတယ်လို့ ဒေသခံများက ပြောပါတယ်။
သတင်း – တမူးနွေဦး
