မြန်မာနိုင်ငံရှိ အင်တာနက်ဝန်ဆောင်မှုတွေထဲက ဖုန်းဆင်းကဒ်နဲ့ အင်တာနက်အသုံးပြုခြင်းကို စစ်ကောင်စီက ပိတ်ခိုင်းခဲ့အပြီး Wireless Broadband စက်တွေနဲ့ အင်တာနက်ပေးတဲ့ စနစ် ဝန်ဆောင်မှုကို ထပ်မံပိတ်ဖို့အတွက် ဧပြီလ ၁ ရက်နေ့မှာ ထပ်မံ ညွှန်ကြားခဲ့တယ်လို့ သိရပါတယ်။
ဆက်သွယ်ရေးအော်ပရေတာတစ်ခုရဲ့ တာဝန်ရှိသူက ဆက်သွယ်ရေး ဝန်ကြီးဌာနက ညွှန်ကြားလာတာမှန်ကန်ပြီး ဒီနေ့ကစပိတ်ခိုင်း တာဖြစ်သလို နောက်ညွှန်ကြားတာမရှိဘူး ပြန်မဖွင့်ရဘူးလို့ ညွှန်ကြားလာတာဖြစ်တယ်လို့ ပြော ပါတယ်။
2600MHz လှိုင်းနှုန်းအသုံးပြု၍ သော်လည်းကောင်း၊ Wireless Broadband Data Service စနစ်ဖြင့် ဝန်ဆောင်မူပေးနေသည့် အင်တာနက်ဝန်ဆောင်မူများအားလုံးကို ပိတ်ဖို့ ညွှန်ကြားခဲ့တာလို့ သိရပါတယ်။
Oredoo ကုမ္မဏီက “ပို့ဆောင်ဆက်သွယ်ရေးဝန်ကြီးဌာနမှ Wireless Broadband ဒေတာ ဝန်ဆောင်မှုများအား ယနေ့မှစ၍ နောက်ထပ်အကြောင်းမကြားခင်အထိ ခေတ္တဆိုင်းငံ့ထားရန် ညွှန်ကြားထားကြောင်း စိတ်မကောင်းစွာဖြင့် အသိပေးလိုပါတယ်။ WBB သုံးစွဲသူများအတွက် ဝန်ဆောင်မှုများ ပြန်လည်ရရှိချိန်တွင် ဒေတာအစီအစဉ်များကို သက်တမ်းတိုးပေးသွားမှာဖြစ်ပါတယ်” လို့ Oredoo WBB သုံးစွဲသူတွေထံ ဒီနေ့ညစာပို့ထားပါတယ်။
Telenor ကုမ္မဏီကတော့ အခုလို စာပို့လာတာမရှိသေးပါ။
