ပြည်ထောင်စုရွေးကောက်ပွဲကော်မရှင်က ဖျက်သိမ်းလိုက်တဲ့ နှင်းဆီပါတီ (ခေါ်) UDP က ကလေးမြို့နယ်ပါတီဝင်တွေက ချင်းအမျိုးသားဒီမိုကရေစီအဖွဲ့ချုပ် ဝိုင်းရံကာကွယ်မယ်လို့ သတင်းရရှိပါတယ်။
ကလေးမြို့နယ်တွင် UDP ပါတီဝင် ချင်းတိုင်းရင်းသား ၄၈၀၀၀ ကျော်ရှိပြီး တမူးခရိုင်တွင် ၂၂၀၀၀ ကျော်ရှိပါတယ်။
ကလေးမြို့နယ် UDP ပါတီဥက္ကဌ ဦးဟုန်းထန်က “ကျနော်တို့က ချင်းပါတီအောင်နိုင်ရေးအတွက် ဝိုင်းရံကာကွယ်ပေးမယ်။ ပါတီထဲဝင်တာတော့မဟုတ်ဘူး။ မဲတော့ ချင်းပါတီထဲမှာ ထည့်ပေးမယ်။ ဒီဟာက UDP ပါတီရဲ့ ရပ်ကျေးစည်းရုံးရေးမှူးတွေအားလုံးရဲ့ ဆုံးဖြတ်ချက်အရပါ။ ဒီနေ့လည်း ဝိုင်းရံကာကွယ်မယ့်ကိစ္စ လက်မှတ်ထိုးဖို့ရှိတယ်” လို့ပြောပါတယ်။
အောက်တိုဘာ (၃၁)ရက်ညနေပိုင်းတွင်လည်း ချင်းအမျိုးသားဒီမိုကရေစီအဖွဲ့ချုပ် ဥက္ကဌတို့အိမ်တွင် UDP ပါတီဦးဆောင်သူအချို့နဲ့ ချင်းပါတီတွေ အတူတကွ ညစာသုံးဆောင်ကြမယ်လို့သိရပါတယ်။
ကလေးမြို့နယ် ချင်းအမျိုးသားဒီမိုကရေစီအဖွဲ့ချုပ် ဥက္ကဌ Pu Lian Nawn က “နှင်းဆီပါတီ ဥက္ကဌ ဦးဟုန်းထန်ကတော့ အပြည့်အဝထောက်ခံသွားမယ်လို့ပြောတယ်။ သူတို့ပါတီဝင်ထဲက ဗမာတွေကတော့ ကြံ့ခိုင်ရေးမှာမဲထည့်မယ့်သူလည်းရှိမယ်လို့တော့ပြောတယ်” လို့ပြောပါတယ်။
