မြန်မာနိုင်ငံမှ ချင်းမျိုးနွယ်စုခေါင်းဆောင်(၆)ဦးဟာ မလေးရှားနိုင်ငံရောက် ချင်းဒုက္ခသည်တွေအရေးနဲ့ပတ်သက်ပြီး သြဂုတ်လ (၁၀)ရက်တွင် သွားရောက်တိုင်ပင်ဆွေးနွေးမှာဖြစ်ပါတယ်။
ယင်းအတွက် ကြိုတင်ပြင်ဆင်တဲ့အနေနဲ့ ရန်ကုန်အခြေစိုက် ချင်းပြည်နယ် မြို့နယ်အသီးသီးမှ လူမှုရေးအသင်းများ၊ မျိုးနွယ်စု လူမှုရေးအသင်းများနဲ့ ဆွေးနွေးတိုင်ပင်ပွဲကို သြဂုတ်လ (၄)ရက် နေ့လည် ၁ နာရီကနေ (၅)နာရီထိ Orchid Hotel မှာပြုလုပ်မှာဖြစ်ပါတယ်။
ယင်းပွဲမှာ မြို့နယ်/မျိုးနွယ်စု လူမှုရေးအသင်းတစ်သင်းလျင် တာဝန်ရှိ ကိုယ်စားလှယ် သုံးဦးစီ တက်ရောက်ဖို့ဖိတ်ခေါ်ထားပါတယ်။
“မလေးရှားနိုင်ငံမှာ တစ်ပတ်ကြာနေထိုင်မှာဖြစ်ပြီး မလေးရှားချင်းအဖွဲ့အစည်းတွေနဲ့ မလေးရှား UNHCR ကိုယ်စားလှယ်တွေနဲ့တွေ့မယ်။ သူတို့ဖြစ်ချင်တာအရင်မေးပြီး တာဝန်ရှိပိုဂ္ဂိုလ်တွေနဲ့ဆွေးနွေးမယ်။ မလေးရှားဆိုင်ရာ မြန်မာသံအမတ်တွေနဲ့လည်းတွေ့မယ်”လို့ ဦးဆောင်သူ ဝန်ကြီးဟောင်း ဆလိုင်းအိုက်ဇက်ခင်ကဆိုပါတယ်။
