နွေဦးတော်လှန်ရေးမှာ လက်နက်ကိုင်လမ်းစဥ်နဲ့ လူထုသပိတ်လှုပ်ရှားမှု နှစ်ခုကို ဟန်ချက်ညီညီထိန်းသိမ်းသွားမယ်

ဒေမီယံ / ၃ အောက်တိုဘာ၊ ၂၀၂၃။

Zalen

နွေဦးတော်လှန်ရေးမှာ အရှိန်ဟုန်မြင့်လာတဲ့ လက်နက်ကိုင်လမ်းစဥ်နဲ့ လူထုသပိတ်လှုပ်ရှားမှုနှစ်ခုကို ဟန်ချက်ညီညီထိန်းသိမ်းသွားဖို့ လိုအပ်တယ်လို့ ကလေးမြို့ ပင်မသပိတ်စစ်ကြောင်း ဆောင်သူကိုဗိုက်ပူက အောက်တိုဘာ ၃ရက်နေ့မှာ ပြောဆိုထားပါတယ်။

နွေဦးတော်လှန်ရေး ၂နှစ်ခွဲကျော်ကြာလာတာနဲ့အမျှ ပြည်သူတွေရဲ့ ရင်းနှီးပေးဆပ်မှုတွေဟာပိုမိုများပြားလာပေမယ့် ဒီနေ့အထိ ပြည်သူလူထုရွေးချယ်ခဲ့တဲ့လက်နက်ကိုင်လမ်းစဥ်ဟာ အားကောင်းနေဆဲဖြစ်သလို ဆန္ဒပြသပိတ်မှောက်လမ်းစဥ်ဟာလည်းတိုးတက်နေပြီး နှစ်ခုလုံးကို ဟန်ချက်ညီညီနဲ့ပြည်သူကပဲ ထိန်းကျောင်းသွားရမှာ ဖြစ်တယ်လို့သူကပြောပါတယ်။

“တော်လှန်ရေး ၂နှစ်ခွဲကျော်ကြာလာတဲ့အထိပြည်သူတွေအနေနဲ့ ရင်းနှီးပေးဆပ်ရတာတွေ၊နစ်နာဆုံးရှုံးရတာတွေအများကြီးရှိခဲ့တယ်။ ဒါပေမယ့် ဘယ်လောက်ပဲ ခက်ခဲပါစေလူထုအပြည့်အဝပါဝင်တဲ့ လူထုသပိတ်တိုက်ပွဲတွေ ဟာ နိုင်ငံရေးစာမျက်နှာပေါ်မှာ ကောင်းမွန်တဲ့ပြယုဂ်တစ်ခုအနေနဲ့ ရှိနေဆဲဖြစ်တယ်။ လူထုကိုယ်တိုင်မွေးဖွားပေးလိုက်တဲ့ လက်နက်ကိုင်လမ်းစဥ် အရှိန်ကောင်းနေသလိုလူထုသပိတ်တိုက်ပွဲတွေဟာလည်း တိုးတက်နေဆဲဖြစ်တယ်။အဲ့ဒီအရာနှစ်ခုကို ဟန်ချက်ညီညီထိန်းသိမ်းသွားနိုင်မှ ပြည်သူလူထုမျှော်မှန်းထားတဲ့နိုင်ငံရေးစနစ်တစ်ခုကို ပုံဖော်နိုင်မှာဖြစ်တယ်။” ကိုဗိုက်ပူက ပြောပါတယ်။

ပြီးခဲ့တဲ့ အောက်တိုဘာ ၁ရက်နေ့အင်တာနက် Zoom Meeting ကတစ်ဆင့်ပြုလုပ်ခဲ့တဲ့ စစ်ကိုင်းတိုင်းဒေသကြီး၊လူထုသပိတ်တိုက်ပွဲဦးဆောင်ကော်မတီ အဖွဲ့ဝင်များ တွေ့ဆုံ အစည်းအဝေးမှာ စစ်ကိုင်းတိုင်းအတွင်းမှာရှိတဲ့မြို့နယ်အရပ်ရပ်က သပိတ်ကော်မတီအဖွဲ့ဝင်အများစုတက်ရောက်ခဲ့ကြပြီး အင်တာနက်လိုင်းအခက်ခဲကြောင့်မတက်ရောက်နိုင်ခဲ့တဲ့ သပိတ်အင်အားစုများလည်း ကျန်နေသေးတယ်လို့သိရပါတယ်။

အဲ့ဒီတွေ့ဆုံဆွေးနွေးပွဲဟာ ၄နာရီခန့်ကြာမြင့်ခဲ့ပြီးလူထုသပိတ်တိုက်ပွဲများ စဥ်ဆက်မပြတ်ရှိနေရေးအပါအဝင် လူထုလှုပ်ရှားမှုများ ပြန်လည်အားကောင်းလာရေးနဲ့ လက်ရှိမြေပြင်မှာသပ်ိတ်ကော်မတီများ ကြုံတွေ့နေရတဲ့အခက်အခဲစိန်ခေါ်မှုများအပြင် ရှေ့ဆက်ပြီးဖြစ်ပေါ်ပြောင်းလဲလာနိုင်တဲ့ နိုင်ငံရေး၊စစ်ရေးအပေါ် အခြေခံဆွေးနွေးခဲ့ကြတယ်လို့ ကလေးမြို့ပင်မသပိတ်အင်အားစုက ထုတ်ပြန်ထားပါတယ်။

“နွေဦးတော်လှန်ရေးစတင်ကတည်းကလမ်းမပေါ်မှာ ငြိမ်းချမ်းစွာဆန္ဒထုတ်ဖော်နေတဲ့လူထုသပိတ်တွေကို ရက်ရက်စက်စက်ဖြိုခွင်းခဲ့တာတွေကိုကြည့်မယ်ဆိုရင်စစ်ကောင်စီဟာ လူထုရဲ့အင်အားကိုအလွန်တရာကြောက်ရွံံ့နေတယ်ဆိုတာသိသာပါတယ်။ဒီလို ဖိနှိပ်မှုပေါင်းစုံကြားကနေဒီနေ့အထိ သပိတ်တိုက်ပွဲတွေကို ခက်ခက်ခဲခဲဆင်နွှဲနေတာကိုကြည့်ရင် စစ်ကောင်စီအပေါ်မှာထားတဲ့ပြည်သူလူထုရဲ့သဘောထားကိုသိနိုင်ပါတယ်။ဖိနှိပ်နေတာပဲဆိုပြီး လက်ပိုက်ကြည့်နေလို့မရပါဘူး။ လူထုတစ်ရပ်လုံး နိုင်ရာနေရာကနေ စစ်ကောင်စီကိုတော်လှန် နေဖို့လိုအပ်ပါတယ်” လို့ ကိုဗိုက်ပူက ထပ်မံပြောဆိုထားပါတယ်။

လက်ရှိမှာလည်း စစ်ကောင်စီရဲ့ ဝင်ငွေလမ်းကြောင်းမှန်သမျှကို ဖြတ်တောက်မယ့်ဒုတိယလှိုင်းလုံးဖြစ်တဲ့ ဘဏ္ဍာရေးတိုက်ပွဲကို ပြည်သူအားလုံးပါဝင်ဆင်နွှဲရင်းစစ်ကောင်စီကို ရှိရာအရပ်ကနေရုပ်ပိုင်း၊စိတ်ပိုင်း တော်လှန်ကြဖို့လည်း ကိုဗိုက်ပူကတိုက်တွန်းပြောဆိုထားပါတယ်။

ကလေးမြို့ဟာ နွေဦးတော်လှန်ရေးစတင်စဥ်ကတည်းက စစ်ကောင်စီရဲ့ မျိုးစုံဖိနှိပ်မှုကြားကနေပဲ ရက်ပေါင်း ၆၀၀ကျော်အထိ စဥ်ဆက်မပြတ်လူထုသပိတ်တိုက်ပွဲ ဆင်နွှဲနေကြတဲ့ ဒေသဖြစ်ပြီးလက်နက်ကိုင်တော်လှန်ရေးကို သန္ဓေတည်ပေးခဲ့ရာတာဟန်းခံတပ်ရှိတဲ့ မြို့လည်းဖြစ်သလိုဗမာလူမျိုး၊ချင်းလူမျိုးစုများနဲ့အခြားတိုင်းရင်းသားများ စုဝေးနေထိုင်ရာ ဒေသတစ်ခုလည်းဖြစ်ပါတယ်။

နောက်ဆုံးရသတင်းများ

ကလေးမြို့မှာ ဖုန်းအတွင်း VPN ဆော့ဝဲလ်တွေ့မှုနဲ့ ဒေသခံတွေကို စစ်ကောင်စီက ဒဏ်ရိုက်

၁၄၊ ဇွန်၊ ၂၀၂၄ Zalen စစ်ကိုင်းတိုင်း၊ ကလေးမြို့ ရပ်ကွက်တွေနဲ့ လမ်းဆုံလမ်းခွနေရာတွေမှာ ဇွန်လ ၁၃ ရက်နေ့က လမ်းသွားလမ်းလာတွေရဲ့ လက်ကိုင်ဖုန်းတွေကို စစ်ကောင်စီတပ်က စစ်ဆေးခဲ့ပြီး VPN (Virtual Private Network) ဆော့ဝဲလ်တွေ့ရှိလို့ ...

ဆက်ဖတ်ရန်