မင်းတပ်မြို့ထဲမှာ ဇန်နဝါရီ(၃)ရက်မှစပြီး လက်နက်ကိုင်ဆောင်ခွင့်ပိတ်ပင်
မင်းတပ်မြို့ထဲမှာ တရားဥပဒေစိုးရေး၊ ရပ်ရွာအေးချမ်းရေးနဲ့တည်ငြိမ်ရေးအတွက် ဓား၊ လုံ၊ လေး၊ မြှား၊ တူမီးသေနတ်ကိုင်ဆောင်ခွင့်ကို ဇန်နဝါရီလ(၃)ရက်ကစပြီး ပိတ်ပင်ထားတယ်လို့ မြို့နယ်အုပ်ချုပ်ရေးမှူးလက်မှတ်နဲ့ ဇန်နဝါရီလ (၃)ရက်နေ့မှာထုတ်ပြန်ထားပါတယ်။
ယင်းဒေသန္တရအမိန့်ထုတ်ပြန်ချက်ထဲတွင် ဘာသာရေးနဲ့ ရိုးရာပွဲလမ်းသဘင်များတွင်ခွင့်ပြုချက်ဖြင့်သာကိုယ်ဆောင်ခွင့်ရှိပြီး စည်းကမ်းမဲ့ လက်နက်ကိုင်ဆောင်သွားလာရင် ၁၉၄၈ ခုနှစ်၊ ချင်းဝိသေသတိုင်းအက်ဥပဒေ ပုဒ်မ ၃၄(၆)ဖြင့်အရေးယူမယ်လို့ကြေညာထားပါတယ်။
၎င်းအမိန့်ထုတ်ပြန်ချက်နဲ့ပတ်သက်ပြီး မင်းတပ်မြို့ဒေသခံ ဆလိုင်းအောင်လောဟာက “ကျနော်ကတော့ ထောက်ခံတယ်။ အကျိုးဆက်လည်း ကြုံခဲ့ရတယ်။ တစ်ခေါက် အိမ်ရှေ့မှာ ဆိုင်ကယ်စီးလာတဲ့လူဆီကနေ သေနတ်ကျလို့ ဖောက်သွားတော့ အိမ်ရှေ့နံရံထိသွားတယ်။ ဓား၊ပလိုင်းလွယ်ပြီး ပြဿနာဖြစ်ရင် အဲ့ဒါအားကိုးကြတာတွေ့ရတယ်။ အရင်ကလည်း မြို့ထဲမှာ ဓားခုတ်မှုတွေရှိတယ်”လို့ပြောပါတယ်။
