ကန်ပက်လက်မြို့နယ် ကျင်ဒွေးရွာကို မကြာမီမြို့အဆင့်တိုးမြှင့်ပေးမယ်လို့ နိုင်ငံတော်အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်က အောက်တိုဘာ(၂၆)ရက်က ကတိပေးထားတယ်လို့သိရပါတယ်။
ကျင်ဒွေးရွာဟာ အိမ်ခြေ သုံးရာမှ လေးရာကြားရှိပြီး ၁၉၇၀ ခုနှစ်ဝန်းကျင်တွင်မြို့ဖြစ်သော်လည်း ၁၉၇၄ အခြေခံဥပဒေကြောင့် ရွာအဆင့်လျော့ကျသွားပါတယ်။
ယင်းကိစ္စနဲ့ပတ်သက်ပြီး ချင်းပြည်နယ် စည်ပင်၊လျှပ်စစ်နဲ့စက်မှုဝန်ကြီး ဦးစိုးထက်က “ကျင်ဒွေးရွာက မြို့ရဖို့ အမှုတွဲတင်ထားတာ နှစ်နှစ်၊သုံးနှစ်လောက်ကြာပြီ။ မကြာခင်က နိုင်ငံတော်အတိုင်ပင်ခံပုဂ္ဂိုလ်ဒေါ်အောင်ဆန်းစုကြည်လာတုန်းက ပြည်သူတွေတင်ပြမှု၊ ဝန်ကြီးနဲ့ဝန်ကြီးချုပ်တို့ရဲ့တင်ပြမှုကြောင့် ဒေါ်အောင်ဆန်းစုကြည်ဥက္ကဌတာဝန်ယူထားတဲ့ လုံ၊တည်၊ဥ(လုံခြုံရေး၊တည်ငြိမ်အေးချမ်းရေး၊ ဥပဒေစိုးမိုးရေးကော်မတီ) ရဲ့ အနီးစပ်ဆုံး အစည်းအဝေးကျရင်အတည်ပြုပေးမယ်လို့ပြောတယ်။ နောက်တစ်လ၊ နှစ်လအတွင်းအစည်းအဝေးထိုင်ဖြစ်ရင်တော့ မြို့ကတော့ သေချာပေါက်ရတော့မှာပေါ့။ ပြည်ထဲရေးမှာအမှုတွဲတင်ထားတာ လုံ၊တည်၊ဥကအတည်ပြုရင် မြို့ဖြစ်မှာ။ ဖြစ်ဖို့တော့သေချာတယ်။ လုံ၊တည်၊ဥက ဆုံးဖြတ်ရင် ပြည်ထောင်စုလွှတ်တော်မှာအတည်ပြုရမယ်။ လွှတ်တော်လည်း ဒီလ(၁၂)မှာကျင်းပမယ်။ ဒါက သေချာပေါက်ရမယ်လို့ထင်တယ်”လို့ပြောပါတယ်။
ကြားဖြတ်ရွေးကောက်ပွဲကျင်းပခါနီးအခုလို ကျင်ဒွေးရွာမြို့အဆင့်တိုးမြှင့်သတ်မှတ်ဖို့သတင်းထွက်ပေါ်လာခြင်းနဲ့ပတ်သက်ပြီး ဝန်ကြီးဦးစိုးထက်က “အခုက မဲဆွယ်တာလည်းမဟုတ်ဘူး၊ တိုက်ဆိုင်လို့ပါ”လို့ပြန်လည်ဖြေရှင်းသွားပါတယ်။
ချင်းပြည်နယ်ဟာ မြို့နယ်(၉)မြို့နယ်နဲ့ မြို့(၈)မြို့ ဖြစ်တဲ့ တီးတိန်မြို့နယ်မှာ ခိုင်ကမ်းမြို့၊ ကျီးခါးမြို့၊ ဖလမ်းမြို့နယ်မှာ ရိခေါ်ဒါရ်မြို့၊ ဝေဘူလမြို့၊ ထန်တလန်မြို့နယ်တွင် နှရိန်းမြို့၊ မတူပီမြို့နယ်တွင် လိုင်လဲပီမြို့၊ ရေဇွာမြို့၊ မင်းတပ်မြို့နယ်တွင် မကွီအိမ်နူးမြို့၊ ပလက်ဝမြို့နယ်တွင် ဆမီးမြို့ စသည်တို့ပါဝင်ပါတယ်။
