ဧပြီ ၁၀၊ ၂၀၂၆
Zalen
မြဝတီမြို့နယ်၊ ရွှေကုက္ကိုလ်ရှိ ကျားဖြန့်နဲ့ တိုက်ရိုက်ဆက်နွှယ်နေတဲ့ ၃၂ နှစ်အရွယ် တရုတ်အွန်လိုင်းလောင်းကစားဂိုဏ်းချုပ်တဦးကို ထိုင်းရဲတပ်ဖွဲ့က ပတ္တရားရှိ ဇိမ်ခံဗီလာတခုမှာ ဒီနေ့မနက်မှာ ဝင်ရောက်စီးနင်းဖမ်းဆီးလိုက်ပါတယ်။
ဖမ်းဆီးခံရသူဟာ အွန်လိုင်းလောင်းကစား ပလက်ဖောင်းပေါင်း ၂၃၉ ခုကို စီမံခန့်ခွဲနေသူဖြစ်ပြီး၊ တရုတ်လောင်းကစားသမား ၃ သိန်းကျော်ထံမှ စုစုပေါင်း ငွေကြေးလည်ပတ်မှု ဘတ် ၁၃.၁၈ ဘီလီယံအထိ ရှိခဲ့တယ်လို့ သိရပါတယ်။
တရုတ်သံရုံးရဲ့ သတင်းပေးချက်အရ ထိုင်းဗဟိုစုံစမ်း စစ်ဆေးရေးဗျူရို (CIB) နဲ့ လူဝင်မှုကြီးကြပ်ရေးတပ်ဖွဲ့တို့က စောင့်ကြည့်ဖမ်းဆီးခဲ့တာဖြစ်ပါတယ်။
၎င်းဟာ ဖမ်းဝရမ်းမှလွတ်ရန် စိန့်ကစ်နဲ့ နီးဗစ် နိုင်ငံကူးလက်မှတ်ကို အသုံးပြုကာ အမည်ပြောင်းလဲ၍ ထိုင်းနိုင်ငံအတွင်းသို့ ဝင်ရောက်ခဲ့တာဖြစ်ပါတယ်။
ဘန်ကောက်မြို့ရှိ အဆင့်မြင့်လူနေအိမ်တခုမှာ လူမသိအောင် ခိုအောင်းနေထိုင်ခဲ့ပြီး၊ ပတ္တရားသို့ အပန်းဖြေခရီးထွက်လာစဉ် ဂျွန်တီးယန်းကမ်းခြေရှိ ဗီလာမှာ အဖမ်းခံခဲ့ရတာဖြစ်ပါတယ်။
လက်ရှိမှာ ထိုင်းအာဏာပိုင်တွေက ၎င်းရဲ့ ဗီဇာကို ရုပ်သိမ်းလိုက်ပြီဖြစ်ကာ၊ တရုတ်နိုင်ငံမှာ ဥပဒေအရ အရေးယူနိုင်ရန်အတွက် တရုတ်အာဏာပိုင်တွေထံ လွှဲပြောင်းရန် လုပ်ငန်းစဉ်တွေ ဆောင်ရွက်နေတယ်လို့ သိရပါတယ်။
ကိုးကား- The Nation Thailand
သတင်း-ဆလိုင်း
