ဟားခါးမြို့တွင်းစည်းကမ်းမဲ့အမှိုက်စွန့်ပစ်သူကို တိုင်ကြားရင် ကျပ်တစ်သိန်းဆုချီးမြှင့်မယ်
ဟားခါးမြို့တွင် အမှိုက်ကို သတ်မှတ်ထားတဲ့နေရာမဟုတ်ဘဲ စည်းကမ်းမဲ့အမှိုက်စွန့်ပစ်သူကို တိုင်ကြားရင် ဒဏ်ငွေရဲ့ ၅၀ ရာခိုင်နှုန်း ကျပ်တစ်သိန်း ဆုချီးမြှင့်မယ်လို့ မြို့နယ်စည်ပင်သာယာရေးကော်မတီကကြေညာထားပါတယ်။
ယင်းကဲ့သို့ ဒဏ်ခတ်မယ့်အစီအစဉ်ကို ကြေညာစာထုတ်တဲ့နေ့ ဇွန်လ ၂၀ ရက်ကနေ စတင်နေပြီလို့သိရပါတယ်။
ဟားခါးမြို့နယ် စည်ပင်သာယာရေးကော်မတီ အမှုဆောင်အရာရှိ ဦးတမ်အောင်ရှိန်းက “မြို့ထဲမှာအမှိုက်ပုံးတော့မချပေးထားဘူး။ ဒါပေမယ့် နေ့တိုင်း စည်ပင်ကားနဲ့ပတ်ပြီး အမှိုက်သိမ်းပေးတယ်” လို့ဆိုပါတယ်။
စည်ပင်နယ်နမိတ်အတွင်း မိမိအစီအစဉ်ဖြင့် အမှိုက်ပစ်ပါက အမှတ် (၁) သချိုင်းကုန်းအလွန် မတူပီလမ်း၊ ဖဒဲအိုချောင်းအနောက်ဖက်ခြမ်းတွင်စွန့်ပစ်ရန် သတ်မှတ်ထားပါတယ်။ ယင်းသို့မဟုတ်ဘဲ မိမိအစီအစဉ်ဖြင့် သတ်မှတ်ထားတဲ့နေရာတွင် အမှိုက်မပစ်ဘဲ စည်းကမ်းမဲ့စွန့်ပစ်သူကို ဖမ်းဆီးပါက ဒဏ်ငွေ ကျပ် နှစ်သိန်းပေးဆောင်ရမယ်လို့ မြို့နယ်စည်ပင်ကကြေညာထားပါတယ်။
ယင်းကဲ့သို့ စည်းကမ်းမဲ့အမှိုက်စွန့်ပစ်သူကို အမည်၊ နေရပ်လိပ်စာ၊ အမှိုက်ပစ်နေစဉ် ဓာတ်ပုံရိုက်၍ သတင်းပေးသူကို စီမံဒဏ်ရဲ့ ၅၀ ရာခိုင်နှုန်း ဆုချီးမြှင့်မှာဖြစ်ပြီး သတင်းပေးပို့သူအမည်ကို ရုံးမှထုတ်ပြန်ခြင်းပြုမယ်မဟုတ်ကြောင်းကြေညာထားပါတယ်။
ဟားခါးမြို့တွင်း မြောင်းထဲတွင် အမှိုက်စွန့်ပစ်မှုကြောင့် မိုးရာသီတွင်မြောင်းတွေပိတ်ဆို့ပြီး လမ်းပေါ်တွင် မိုးရေတွေစီးဆင်းလျက်ရှိပါတယ်။
