ဇူလိုင် ၈၊ ၂၀၂၆
Zalen
မီဇိုရမ်ပြည်နယ်၊ ကျန်ဖိုင်းခရိုင် ဖရ်းကောန် (Farkawn) ကျေးရွာအနီးရှိ Lamsial Puk ဂူအတွင်း တွေ့ရှိထားတဲ့ လူအရိုးနမူနာတခုကို သိပ္ပံနည်းကျ စစ်ဆေးခဲ့ရာ အေဒီ ၁၇၂၉ ခုနှစ်မှ ၁၇၈၉ ခုနှစ်အတွင်း နေထိုင်ခဲ့သူများရဲ့ အရိုးဖြစ်ကြောင်း အတည်ပြုနိုင်ခဲ့တယ်လို့ Mizo Archaeological Society (MAS) က ထုတ်ပြန်ပါတယ်။
MAS ဟာ Lamsial Puk ဂူအတွင်းရှိ လူအရိုးနမူနာတခုကို အမေရိကန်နိုင်ငံ ဖလော်ရီဒါပြည်နယ် မိုင်ယာမီမြို့ရှိ Beta Analytics သို့ ပေးပို့ကာ Radiocarbon (Carbon-14) Dating နည်းလမ်းဖြင့် သက်တမ်းသတ်မှတ် စစ်ဆေးစေခဲ့ခြင်းဖြစ်ပြီး၊ ရရှိလာတဲ့ရလဒ်အရ အဆိုပါအရိုးစုများဟာ အေဒီ ၁၇၂၉ ခုနှစ်မှ ၁၇၈၉ ခုနှစ်အတွင်းက ဖြစ်ကြောင်း တွေ့ရှိခဲ့တာဖြစ်ပါတယ်။
ဂူအတွင်းမှာလူအရိုးအများအပြား တွေ့ရှိထားပေမယ့် ယခုစစ်ဆေးထားတာက နမူနာတခုတည်းသာ ဖြစ်သဖြင့် ဂူအတွင်းရှိ အရိုးအားလုံးဟာ အလားတူကာလက ဖြစ်တယ်လို့ မဆိုလိုကြောင်း MAS က ရှင်းလင်းထားပါတယ်။
Carbon-14 Dating စစ်ဆေးမှုအတွက် ကုန်ကျစရိတ်အဖြစ် ၂၀၂၃ ခုနှစ်တွင် မီဇိုရမ်အစိုးရရဲ့ Art & Culture Department ထံမှ အိန္ဒိယရူပီး ၁ သိန်း ၅ သောင်း (₹၁,၅၀,၀၀၀) ထောက်ပံ့ငွေ ရရှိခဲ့ကြောင်းလည်း သိရပါတယ်။
Mizo Archaeological Society ဟာ မီဇိုလူမျိုးတို့ရဲ့ သမိုင်းနဲ့ ယဉ်ကျေးမှုအမွေအနှစ်များကို သိပ္ပံနည်းကျ လေ့လာသုတေသနပြုနေတဲ့ ပညာရှင်များဖြင့် ဖွဲ့စည်းထားသော အဖွဲ့အစည်းဖြစ်ပြီး၊ မီဇိုရမ်ပြည်နယ်အတွင်း တွေ့ရှိလာတဲ့ ရှေးဟောင်းအရိုးများနဲ့ရှေးဟောင်းပစ္စည်းများကို ဆက်လက်စုဆောင်း လေ့လာလျက်ရှိကြောင်း သိရပါတယ်။
သတင်း – Mickey
#မီဇိုရမ်ပြည်နယ် #ကျန်ဖိုင်းခရိုင် #Farkawnကျေးရွာ #LamsialPukဂူ #လူအရိုးနမူနာတွေ့ #Zalen
