မလေးရှားနဲ့အိန္ဒိယနိုင်ငံရှိ ချင်းဒုက္ခသည်တွေအပေါ် UNHCR ကဇွန်လတွင်ထုတ်ပြန်ချက်ဟာ ဒုက္ခသည်အခွင့်အရေးချိုးဖောက်နေခြင်းဖြစ်တယ်လို့ သြဂုတ်(၂၈)ရက်ကထုတ်ပြန်တဲ့ မြန်မာနိုင်ငံချင်းတက္ကသိုလ်ကျောင်းသားထုရဲ့ ပူးတွဲသဘောထားထုတ်ပြန်ချက်ထဲမှာဖော်ပြထားပါတယ်။
၎င်းကြေညာချက်ဟာ အချက်(၄)ချက်ပါဝင်ပြီး မြန်မာတနိုင်ငံလုံးရှိ ချင်းကျောင်းသားအဖွဲ့အစည်း(၁၆)ဖွဲ့သဘောတူညီမှုနဲ့ထုတ်ပြန်ထားတယ်။
“ပထမအချက်ကတော့ အရင်တုန်းက ချင်းပါတီတွေထုတ်ပြန်တဲ့ကြေညာချက်တွေနဲ့ အိန္ဒိယချင်းဒုက္ခသည်တွေထုတ်ပြန်ချက်ပေါ်သဘောထားကြောင်း၊ ဒုတိယအချက်က UNHCR က ချင်းပြည်နယ်ဟာ တည်ငြိမ်အေးချက်တယ်လို့ရေးထားတာတွေ့ရတယ်။ အဲ့ပေါ်မှာ မေးခွန်းထုတ်စရာဖြစ်တယ်။ ကယာကံရှင်တွေကိုတွေ့ဆုံမှုမရှိဘဲ ဒီလိုဆုံးဖြတ်ချက်ချတာာ UNHCR ကိုယ်တိုင်က ချင်းဒုက္ခသည်တွေရဲ့အခွင့်အရေးကိုချိုးဖောက်နေတာဖြစ်တယ်။ ပြန်လာဖို့ဆိုရင် ဂုဏ်သိက္ခာရှိရှိပြန်လာနိုင်အောင် UNHCR နဲ့မြန်မာနိုင်ငံအစိုးရကိုယ်တိုင်ညှိုနှိုင်းပြီးလုပ်ဆောင်သင့်တယ်”လို့ ချင်းစာပေနှင့်ယဉ်ကျေးမှုကော်မတီ(တက္ကသိုလ်များ-ရန်ကုန်)ဥက္ကဌ ဆလိုင်းအုပ်နွန်ဘွေကပြောပါတယ်။
ဒီကြေညာချက်ကို သူတို့ UNHCR ရုံး၊ တာဝန်ရှိတဲ့ အစိုးရရုံးတွေနဲ့ လူမှုကွန်ရက်စာမျက်နှာတွေပေါ်မှာ တင်သွားတယ်။
