ကလေးတက္ကသိုလ်တွင် Quarantine အဖြစ်နေထိုင်စဉ် စည်ကမ်းဖောက်ဖျက်ပြီး ဆူပူသောင်းကျန်းတဲ့ လူငယ် (၅)ဦးကို ကူးစက်ရောဂါကာကွယ်ရေးဥပဒေ ပုဒ်မ (၁၈) နဲ့ ကလေးမြို့ပြည်သူ့ကျန်းမာရေးဌာနက ဇူလိုင် (၂၁)ရက်အမှုဖွင့်ထားတယ်လို့သတင်းရရှိပါတယ်။
၎င်းတို့ဟာ Quarantine နေထိုင်တဲ့ ကလေးတက္ကသိုလ်ကျောင်းက မှန်တံခါးများ၊ ထိုင်ခုံ၊ တင်းနစ်စားပွဲများကိုဖျက်ဆီးကြတယ်လို့သိရပါတယ်။
ကလေးမြို့ ပြည်သူ့ကျန်းမာရေးဌာနက တာဝန်ရှိသူ ဒေါက်တာစန်းမောင် က “ကလေးတက္ကသိုလ်ကျောင်းဘက်ကလည်း အစတုန်းကတော့ဆွဲမလို့ပဲ ဒါပေမယ့် အဲ့ဒီအမှုကကြီးလွန်းတယ်ဆိုပြီးနောက်တော့မဆွဲဖြစ်တော့ဘူး။ ခုံတွေလည်းလွင့်ပစ်တယ်။ ပါတင်းပေါက်မှန်တွေလည်းခွဲပစ်တယ်လေ။ နောက်ပြီးတော့ စင်တာမှာအရက်သေစာမသောက်ရဘူး။ သူတို့ကညမှာ အရက်မူးတယ်၊ ဆူတယ်။ တခြားခန်းတွေကလည်း ပြောတော့တာလေ။ ပြောတဲ့သူတွေကိုလည်း သူတို့က ပြန်ပြီးအော်ဟစ်တော့တာ” လို့ပြောပါတယ်။
ကလေးတက္ကသိုလ် Quarantine တွင်နေထိုင်သူ (၇၄)ဦးရှိပြီး ၎င်းတို့ဟာ အိန္ဒိယ၊ တရုတ် နိုင်ငံကပြန်လာတဲ့သူတွေဖြစ်ပါတယ်။
ကူးစက်ရောဂါကာကွယ်ရေးဥပဒေ ပုဒ်မ (၁၈) (တားမြစ်ပိတ်ပင်သည့် (သို့) ကန့်သတ်သည့်အမိန့် ဖောက်ဖျက်ကျူးလွန်မှု) ဟာ ပြစ်မှုထင်ရှားရင် ထောင်ဒဏ် ၆ လဖြစ်စေ၊ ကျပ် ၅ သောင်းထိမပိုတဲ့ဒဏ်ငွေဖြစ်စေ ဒဏ်နှစ်ရပ်လုံးဖြစ်စေ ချမှတ်နိုင်ပါတယ်။
