သိုးသရေခြုံတဲ့ ဝံပုလွေတွေလို့ ချင်းပြည်နယ်အစိုးရကို ကန်ပက်လက်အမတ် ဝေဖန်
မြို့နယ် အလိုက် ဘတ်ဂျက်ခွဲဝေမှု မညီမျှခြင်းကြောင့် ချင်းပြည်နယ် အစိုးရကို သိုးသရေခြုံတဲ့ ဝံပုလွေတွေလို့ ကန်ပက်လက်မြို့နယ် ပြည်နယ်လွှတ်တော်ကိုယ်စားလှယ် ဦးကွီးထန်းက ဝေဖန်လိုက်ပါတယ်။
(၁၉)ကြိမ်မြောက် ချင်းပြည်နယ်လွှတ်တော်အစည်းအဝေး ပထမနေ့ (စက်တင်ဘာ ၂၅)ရက်တွင် ၂၀၁၉-၂၀၂၀ ပြည်နယ် န.တ.လ ထပ်တိုးဘတ်ဂျက်မေးခွန်းမေးမြန်းစဉ် အခုလို ဝေဖန်လိုက်တာပါ။
လွှတ်တော်အမတ် ဦးကွီးထန်က “ချင်းပြည်နယ် ဘတ်ဂျက်ခွဲဝေမှုမှာ မြို့နယ်အလိုက်မျှမျှတတဖြစ်ဖို့ ပြောတုန်းကတော့ အစိုးရက ဟုတ်ကဲ့လို့ပြောပါတယ်။ လက်တွေ့မှာတော့ သူတို့ လုပ်ချင်တဲ့အတိုင်း ဖြစ်ဖြစ်သွားတယ်လေ။ အပြောမှာတော့ အဆင်ပြေကြတယ်။ တကယ့်လက်တွေ့တွေ၊ စီမံကိန်းတွေလုပ်လာတဲ့ခါကျတော့ ဝန်ကြီးတွေ ရှိတဲ့ မဲဆန္ဒနယ်မှာ ဘတ်ဂျက်တွေ အသာစီးရနေတယ်။ တကယ်ဆို သူတို့ မိဘနေရာမှာနေပြီး ၉ မြို့နယ်လုံးမှာ ညီတူညီမျှဖြစ်အောင် မိဘနေရာမှာ စီမံခန့်ခွဲရမှာကိုး။ လမ်းဦးစီးဌာနက ဥပမာတစ်ခုထဲပြောတာ။ တခြားဌာနတွေလည်းအများကြီးပဲ။ မေးခွန်းမေးတဲ့ခါမှာ ပြောရင်းနဲ့ သခင်ယေရှုပြောတဲ့စကားနဲ့ပြောလိုက်တာပါ” လို့ပြောပါတယ်။
၂၀၁၉-၂၀၂၀ ပြည်နယ်ဘတ်ဂျက်ကို ၁၉ ကြိမ်မြောက်လွှတ်တော်အစည်းအဝေးမှာ အတည်ပြုခဲ့ပြီး ယင်းဘတ်ဂျက်ထဲမှ လမ်းဦးစီးဌာန တစ်ခုထဲတွင် ဟားခါးမြို့နယ်မှာ သန်း ၉၀၀၀ ကျော်၊ ဖလမ်းမြို့နယ်တွင် သန်း ၇၀၀၀ ကျော်၊ ထန်တလန်မြို့နယ်တွင် သန်း ၅၀၀၀ ကျော်၊ မင်းတပ်ဆိုရင် ၂၀၀၀၊ ကန်ပက်လက်မြို့နယ်ဆိုရင် ၂၁၀၀ သာ ချပေးထားပါတယ်လို့ ဦးကွီးထန်းက ဆိုပါတယ်။
