သက်ငယ်မုဒိမ်းမှုအပါအဝင် ပုဒ်မ(၄)ခုနဲ့ ကလေးခရိုင်တရားရုံးက တရားဆွဲတင်ထားတဲ့ ဧဝံဂေလိတရားဟောဆရာ Lar Boih ရုံးချိန်းရက်ကို ရွေ့ဆိုင်းခဲ့ရတယ်လို့သိရပါတယ်။
မေလ(၂၅)ရက်မှာ ဧဝံဂေလိတရားဟောဆရာကို ကလေးခရိုင်တရားရုံးက ပထမဆုံးအကြိမ် အမှုစစ်ဖို့ မေလ(၁၁)ရက်က ချိန်းထားပေမယ့် တရားသူခရီးလွန်နေတာကြောင့် ပြန်လည်ရွေ့ဆိုင်းခဲ့ရခြင်းဖြစ်ပါတယ်။
“ခရိုင်တရားသူကြီးက မုံရွာဆင်းတာကြောင့် သူပြန်လာတဲ့ချိန်မှပဲ အမှုပြန်စစ်မယ်လို့သိရပါတယ်။ ဘယ်နေ့ရုံးချိန်းလဲတော့ ပြန်မပြောထားဘူး။ နောက်ပတ် ဒါမှမဟုတ် ဇွန်လဆန်းဘက်ဖြစ်နိုင်တယ်”လို့တရာလိုဘက်က ဆွေမျိုးတစ်ယောက်ကပြောပါတယ်။
ဧဝံဂေလိတရားဟောဆရာကို တရားစွဲတင်လိုက်တဲ့ ပုဒ်မတွေကတော့ ပုဒ်မ ၃၇၆(မုဒိမ်းမှု)၊ ၃၂၃(နာကျင်စေမှု)၊ ၅၀၆(ခြိမ်းခြောက်မှု)၊ ၃၇၆/၅၁၁(အားထုတ်မှု) တို့ဖြစ်ပါတယ်။ ပုဒ်မ ၃၇၆(မုဒိမ်းမှု)ဟာ အမြင့်ဆုံး ထောင်ဒဏ်နှစ်(၂၀)ထိချမှတ်နိုင်တယ်။
ကလေးမြို့နယ် လက်ပံချောင်းရွာမှာနေထိုင်တဲ့ ဧဝံဂေလိတရားဟောဆရာ Lal Biak Lar@ Lar Boih ဟာ ဖလမ်းမြို့နယ်ကနေ ၎င်းတို့နေအိမ်မှာလာရောက်နေထိုင်တဲ့ မိုင်….(၁၅နှစ်)ကို ၂၀၁၅ ခုနှစ် ဇွန်လပိုင်းမှာလည်းကောင်း၊ မိုင်….(၁၄နှစ်)ကို ၂၀၁၈ ခုနှစ် ဧပြီလမှာလည်းကောင်း အဓမ္မပြုကျင့်တယ်လို့ဆိုကာ ဧပြီလ(၁၃)ရက်တွင် ကလေးမိဘတွေကိုယ်တိုင်က တာဟန်းရဲစခန်းမှာ အမှုဖွင့်လိုက်ပါတယ်။
