၂၀၁၉၊ အောက်တိုဘာ (၁၂)
တီးတိန်မြို့နယ် တုန်းဇန်ကျေးရွာတွင် ယမန်နေ့ ည (၁၁း၄၅)အချိန်က စပြီး အ.ထ.က(ခွဲ)ကျောင်းဆောင် တစ်ဆောင်၊ ဝန်ထမ်းအိမ်ရာ (၅)လုံးနဲ့ ကျောင်းအနီးရှိ လူနေအိမ်တစ်လုံး မီးလောင်ပျက်ဆီးသွားတယ်လို့ သတင်းရရှိပါတယ်။
လူနေအိမ်တစ်လုံးက မီးမကူးအောင် ကြိုတင်ဖျက်ဆီးလိုက်တာပါ။
တုန်းဇန်ကျေးရွာ အုပ်ချုပ်ရေးမှူး ဦးခမ်လျန်ဟောင်က “မီးလောင်တဲ့ထဲမှာ ကျောင်းစာရွက်စာတမ်းတွေအကုန်လုံးမီးထဲပါသွားတယ်။ ရွာသားတွေက ကျောင်းရှေ့ကရေပိုက်နဲ့ မီးငြိမ်းပေမယ့် ဘာမှမထူးဘူး။ လူအသေအပျောက်နဲ့ ဒဏ်ရာရတာတော့မရှိဘူး” လို့ပြောပါတယ်။
နံကပ်တိုက် ကျောင်းဆောင်တစ်လုံးနဲ့ ဝန်ထမ်းအိမ်ရာ ၄ လုံးကတော့ မီးမလောင်ပဲ ကျန်ရှိပါသေးတယ်။ ဝန်ထမ်းအိမ်ရာတွင် ဆရာ၊မ ၄ ယောက်အိမ်မပြန်သေးဘဲ နေထိုင်ကြပါတယ်။
တီးတိန်မြို့နယ် အုပ်ချုပ်ရေးမှူး ဦးဂိုဆွမ်ခိုင်က “ ကျောင်းဆရာမ အိမ်ကနေ မီးစလောင်တယ်လို့ပြောတယ်။ ဘာကြောင့်လောင်တယ်ဆိုတာတော့ စုံစမ်းစစ်ဆေးရေးအဖွဲ့က အသေးစိတ်သွားရောက်စစ်ဆေးရအုံမယ်။ ဒီနေ့ ပညာရေးမှူးနဲ့ သွားဖို့ရှိတယ်။ ကျောင်းပြန်ဖွင့်ရင်တော့ အနီးဆုံး ဘုရားရှိခိုးကျောင်းတွေနဲ့ မူလတန်းကျောင်းဆောင်သစ်တစ်ခုရှိတယ်အဲ့မှာ ကလေးတွေစာသင်မယ်။ လိုအပ်တဲ့ ပရိဘောဂပစ္စည်းတွေကတော့ တွီးထန်နဲ့ တုန်းဇန်ရွာကလူတွေစီစဉ်ဖို့ဆုံးဖြတ်ထားတယ်” လို့ပြောပါတယ်။
တုန်းဇန်ကျေးရွာ အ.ထ.က(ခွဲ)ကျောင်းတွင် ကျောင်းသူ၊သား ၄၀၀ ကျော်ရှိပါတယ်။
