မေ ၁၉၊ ၂၀၂၆
Zalen
ချင်းပြည်နယ် မြောက်ပိုင်း၊ တွန်းဇံမြို့နယ်အတွင်းမှာ မေလ ၁၈ ရက်နေ့ ညနေပိုင်းကစပြီး ZRA-စစ်ကောင်စီ ပူးပေါင်းတပ်တွေနဲ့ ချင်လဲန်းကောင်စီ ပူးပေါင်းတပ်ဖွဲ့တွေအကြား တိုက်ပွဲတွေ ပြင်းထန်စွာ ဖြစ်ပွားနေတယ်လို့ သိရပါတယ်။
ZRA နဲ့ စစ်ကောင်စီ ပူးပေါင်းစစ်ကြောင်းဟာ တွန်းဇံမြို့ဘက်ကို စစ်ကြောင်းထိုး ချီတက်လာတာကြောင့် Tungtuang ကျေးရွာနဲ့ တွန်းဇံမြို့အကြားမှာ နှစ်ဖက်တပ်တွေ ထိတွေ့တိုက်ပွဲ ဖြစ်ပွားခဲ့တာပါ။
” လက်ရှိကတော့ Tungtuang ရွာမှာ စကစ စစ်ကြောင်းနဲ့ CC တပ်တွေ တိုက်ပွဲဖြစ်နေတယ်။ စစ်ကောင်စီက လေယာဉ်နဲ့ ခဏခဏ ဗုံးလာကြဲနေတယ်။ လူငယ်တွေ ရှိမယ်ထင်တဲ့ နေရာတွေမှာ ကြဲနေတာ။ ” လို့ ဒေသခံတဦးက ပြောပါတယ်။
မြေပြင်တိုက်ပွဲအတွင်း စစ်ကောင်စီဘက်က လေကြောင်းပစ်ကူပေးခဲ့ပြီး၊ မေလ ၁၈ ရက် ညနေ ၆ နာရီခွဲဝန်းကျင်မှာ တွန်းဇံမြို့ပေါ်ကို စစ်လေယာဉ်နဲ့ ဗုံးတွေ ဆက်တိုက် ကြဲချတိုက်ခိုက်ခဲ့တယ်လို့ ဒေသခံတဦးက ပြောပါတယ်။
စစ်ကောင်စီရဲ့ လေကြောင်းဗုံးကြဲမှုကြောင့် ဒေသခံပြည်သူတွေ ထိခိုက်ဒဏ်ရာရရှိမှုနဲ့ အဆောက်အအုံ ပျက်စီးဆုံးရှုံးမှုကိုတော့ မသိရှိရသေးပါ။
Mary
#တွန်းဇံမြို့ #Tungtuang #စစ်ကောင်စီ#လေကြောင်း#ဗုံးကြဲ #Zalen
