အိုက်ခူမီး/၂၂၊ အောက်တိုဘာ၊ ၂၀၂၃
Zalen
မန္တလေးတိုင်း နွားထိုးကြီး-မြင်းခြံလမ်းပိုင်း စစ်ဆေးရေးပြုလုပ်နေတဲ့ PDF တပ်ဖွဲ့နဲ့ စစ်ကောင်စီတပ်ဖွဲ့တို့ ပစ်ခတ်မူဖြစ်ပွားပြီး စစ်ကောင်စီတပ်ဖွဲ့ဝင် ၃ ဦးသေဆုံးပြီး ၉ ဦး ပြင်းထန်ဒဏ်ရာ ရရှိခဲ့တယ်လို့ နွားထိုးကြီးပြည်သူ့ကာကွယ်ရေးတပ်ဖွဲ့ မြင်းခြံခရိုင်အမှတ်(၄)တပ်ရင်းက ထုတ်ပြန်ထားပါတယ်။
အောက်တိုဘာလ ၂၁ ရက်နေ့ မနက် ၈ နာရီဝန်းကျင် မြင်းခြံခရိုင် အမှတ်(၄)တပ်ရင်းနဲ့အတူ ပူးပေါင်းမဟာမိတ်တပ်ဖွဲ့တို့က ၎င်းလမ်းပိုင်းရှိ မော်တော်ယာဥ်တွေကို စစ်တပ်ထုတ်ကုန်ပစ္စည်းတွေ သယ်ဆောင်ခြင်း ရှိ၊ မရှိ စစ်ဆေးနေစဥ် စစ်ကောင်စီဘက်က စစ်ကြောင်း ၂ ကြောင်းနဲ့ လာရောက် ပစ်ခတ်ခဲ့တာလို့ မြင်းခြံခရိုင် အမှတ် ၄ တပ်ရင်း တာဝန်ရှိသူတစ်ဦက Zalen ကို ပြောပါတယ်။
” ကျွန်တော်တို့ နွားထိုးကြီး-မြင်းခြံလမ်းပိုင်း သာယာကုန်းကျေးရွာမှာ ၄၅ မိနစ်ကြာ စစ်ဆေးရေးဆောင်ရွက်ပြီးမှ နွားထိုးကြီးမြို့နဲ့ မြင်းခြံမြို့ဘက်က စစ်ကောင်စီ စစ်ကြောင်း ၂ ကြောင်းနဲ့ တိုးပြီး အပြန်အလှန် ပစ်ခတ်မူဖြစ်တာပါ၊ ပစ်ခတ်မူ မိနစ် ၂ဝ ကြာပါတယ်”ဟု ဆိုပါတယ်။
တိုက်ပွဲတွင်း PDF တပ်ဖွဲ့ရဲ့ စနှိုက်ပါဖြင့် ပစ်ခတ်မူကြောင့် စစ်ကောင်စီတပ်ဖွဲ့ဝင် ၂ ဦးနဲ့ ရဲတပ်ဖွဲ့ဝင် ၁ ဦး သေဆုံးခဲ့တယ်။ ဒါ့အပြင် PDF ပူးပေါင်းမဟာမိတ်တပ်ဖွဲ့တို့က ဒရုန်းဖြင့် ဗုံးသီး ၁ လုံးဖြင့် တိုက်ခိုက်ရာ စစ်ကောင်စီ တပ်ဖွဲ့ဝင် ၉ ဦး ထပ်မံ ပြင်းထန်ဒဏ်ရာရရှိခဲ့တယ်လို့ ဆိုပါတယ်။
PDF ပူးပေါင်းမဟာမိတ်တပ်ဖွဲ့ဘက်မှ တပ်ဖွဲဝင် ၁ ဦး မစိုးရိမ်ရ ဒဏ်ရာရရှိခဲ့တယ်လို့ ဆိုပါတယ်။
တိုက်ပွဲကို Natogyi People Defence မြင်းခြံခရိုင်အမှတ်(၄)တပ်ရင်းနဲ့အတူ၊ မြင်းခြံခရိုင် အမှတ်(၁)တပ်ရင်း၊ မြင်းခြံခရိုင် အမှတ်(၃)တပ်ရင်း၊ မြင်းခြံခရိုင် အမှတ်(၈)တပ်ရင်း၊ မန္တလေးခရိုင် အမှတ် (၃)တပ်ရင်း၊ နွားထိုးကြီးမြို့နယ် ပကဖ၊ Myingyan District Drone Strike ၊ ဗိုလ်စားေပြာက်ကြားတပ်ဖွဲ့၊ Myingyan Black Tiger တပ်ဖွဲ့တို့က ပူးပေါင်းလုပ်ဆောင်ခဲ့တယ်လို့ သိရပါတယ်။
