ချင်းရိုးရာ ထဘီ အပေါ် အောက်ချင်းငှက်ရုပ်ပါတဲ့ ထဘီ(၁၀)ထည်ကို ကချင်ပြည်နယ် ဖားကန့်မြို့နယ်၊ နမ့်မှော်ကျေးရွာမှာ ကမ္ဘာလုံးဆိုင်ရာ ချင်းအမျိုးသားရေးနှင့် ချင်းရိုးရာယဉ်ကျေးမှုထိန်းသိမ်းစောင့်ရှောက်ရေးကော်မတီက စက်တင်ဘာ(၅)ရက်မှာ မီးရှို့လိုက်ပါတယ်။
ဖြစ်စဉ်မှာ နမ့်မှော်ကျေးရွာမှာ မခင်စောထွေးက ချင်းရိုးရာအထည်ရောင်းဝယ်ဖောက်ကားတဲ့ ထဘီပေါ် အောက်ချင်းငှက်ရုပ်ပုံပါတဲ့ အထည်တွေကို ဖမ်းဆီးပြီး မီးရှို့တာဖြစ်ပါတယ်။ နောက်နောင်မှာလည်း အောက်ချင်းငှက်ပါတဲ့ ချင်းရိုးရာထဘီ ရောင်းဝယ်ခြင်းမပြုလုပ်ဖို့၊ ရောင်းဝယ်ဖောက်ကားမှုတွေ့ရှိပါက အမျိုးသားရေးထိပါးစော်ကားမှုအဖြစ် ကမ္ဘာလုံးဆိုင်ရာ ချင်းအမျိုးသားရေးနှင့် ချင်းရိုးရာယဉ်ကျေးမှုထိန်းသိမ်းစောင့်ရှောက်ရေးကော်မတီက ထိထိရောက်ရောက်အရေးယူမယ်လို့ခံဝန်ကတိရေးထိုးစေတယ်။
ကချင်ပြည်နယ်၊ ဖားကန့်မြို့နယ်၊ နမ့်မှော်ကျေးရွာမှာ အောက်ချင်းငှက်ရုပ်ပုံပါတဲ့ ချင်းထဘီ(၁၀)ထည်ကို မီးရှို့ကြစဉ်(ဓာတ်ပုံ- Salai Ling Htun Aung Chin)
ယင်းကိစ္စနဲ့ပတ်သက်ပြီး ဖားကန့်မြို့က ကမ္ဘာလုံးဆိုင်ရာ ချင်းအမျိုးသားရေးနှင့် ချင်းရိုးရာယဉ်ကျေးမှုထိန်းသိမ်းစောင့်ရှောက်ရေးကော်မတီ ဝင် ဆလိုင်းအွမ်နိုင်းက “အထည်ရဲ့တန်ဖိုးတစ်ဝက်ပေးတယ်။ နောက်နောင် ပြန်မရောင်းဖို့ လက်မှတ်ထိုးခိုင်းတယ်။ နားလည်အောင်လည်းရှင်းပြတယ်။ သူယူတဲ့ဖောက်သည်ဆိုင်ကိုလည်း ဖုန်းဆက်ပြီး ပြန်မရောင်ဖို့နှုတ်ကတိခံခိုင်းတယ်”လို့ဆိုပါတယ်။