အောက်တိုဘာ ၂၈၊ ၂၀၂၅
Zalen
စစ်ကောင်စီက ကျင်းပမယ့် ရွေးကောက်ပွဲမှာ ပါဝင်ယှဉ်ပြိုင်မယ့် ကိုယ်စားလှယ်လောင်း နှစ်ဦးရဲ့ နေအိမ်တွေကို CDF တွန်းဇံက ချိပ်ပိတ်လိုက်တယ်လို့ သိရပါတယ်။
အောက်တိုဘာလ ၂၅ ရက်နေ့မှာ တွန်းဇံမြို့ပေါ်က နေအိမ်တွေကို ချိပ်ပိတ်ခဲ့တာဖြစ်တယ်လို့ ဒေသခံတွေက ပြောပါတယ်။
အိမ်ချိပ်ပိတ်ခံရသူတွေဟာ ပြည်ထောင်စုကြံ့ခိုင်ရေးနှင့် ဖွံ့ဖြိုးရေးပါတီကိုယ်စားလှယ်လောင်း ဦးကျင်တုန်းမန် ( U Cin Tung Mang) နဲ့ ဇိုမီးအမျိုးသား ပါတီ (ZNP) က ကိုယ်စားလှယ်လောင်း ဦးနန်ခင်းဇမ် (U Nang Khan Zam) တို့ ဖြစ်ပါတယ်။
သူတို့ဟာ ချင်းပြည်နယ်အမျိုသားလွှတ်တော်မှာ အချိုးကျကိုယ်စားပြုစနစ် မဲဆန္ဒနယ် အမှတ် ၁ အတွက် ၀င်ပြိုင်မှာဖြစ်ပါတယ်။
တွန်းဇံမြို့ကို ချင်းတော်လှန်ရေးတပ်တွေက သိမ်းပိုက်ထားတဲ့နောက် ဦးကျင်တုန်းမန်နဲ့ ဦးနန်ခင်းဇမ်တို့ဟာ ကလေးမြို့ကို ပြောင်းရွှေ့နေထိုင်ကြပြီး ရွေးကောက်ပွဲ၀င်ပြိုင်ကြတာဖြစ်ပါတယ်။ ဒါကြောင့် တွန်းဇံ မြို့ပေါ်ရှိ သူတို့ရဲ့ နေအိမ်တွေကို ချိပ်ပိတ်ခဲ့တာလို့ သိရပါတယ်။
“ စကစ နဲ့ပတ်သက်လို့ဆိုပြီး သူတို့ကို CDF တွန်းဇံက ဖမ်းသေးတာ၊ နောက်မှ ပြန်လွှတ်ပေးတာ။ ကလေးမှာပြောင်းနေပြီးတော့ အခုရွေးကောက်ပွဲပြိုင်တာ။ ချိပ်ပိတ်တာတော့ အားပေးတယ်၊ ထောက်ခံတယ်။ မြို့ပေါ်ကို ပြန်တောင်မလာရဲဘူးလေ။ ” လို့ တွန်းဇံမြို့ဒေသခံတစ်ဦးက ပြောပါတယ်။
တွန်းဇံမြို့ကို ၂၀၂၄ ခုနှစ်၊ မေလကတည်းက CDF တွန်းဇံနဲ့ ချင်းပြည်ကောင်စီတပ်ဖွဲ့တွေက သိမ်းပိုက်ခဲ့ပြီး လက်ရှိမှာ ပြည်သူ့အုပ်ချုပ်ရေးလည်ပတ်နေတာပါ။
စစ်ကောင်စီက ကျင်းပမယ့် ရွေးကောက်ပွဲမှာ အပိုင်း ၁ အနေနဲ့ ဟားခါးမြို့နဲ့ တီးတိန်မြို့နယ်တို့ ပါဝင်ပြီး ထန်တလန်မြို့နယ်၊ တွန်းဇံမြို့နယ်နဲ့ ဖလမ်းမြို့နယ်တွေမှာပါ ရွေးကောက်ပွဲ ကျင်းပမယ်လို့ ပြောထားပါတယ်။
ချင်းပြည်နယ်မှာ စစ်ကောင်စီက ကျင်းပမယ့် ရွေးကောက်ပွဲမှာ ကိုယ်စားလှယ်လောင်း ၈၃ ယောက် ပါဝင်ယှဉ်ပြိုင်မယ်လို့ ပြည်ထောင်စုရွေးကောက်ပွဲကော်မရှင် (UEC) က ထုတ်ပြန်ထားပါတယ်။
Yuki
