မေ ၂၀၊ ၂၀၂၆
Zalen
ထိုင်း-မြန်မာနယ်စပ် မြဝတီမြို့နယ်အတွင်း အွန်လိုင်းငွေလိမ်ဂိုဏ်း (ကျားဖြန့်) တွေဆီကနေ ဖမ်းမိထားတဲ့ နိုင်ငံခြားသားတွေထဲက ၇၆၆ ဦးကို မြန်မာနိုင်ငံ လူဝင်မှုကြီးကြပ်ရေးဥပဒေ၊ မူးယစ်ဆေးဝါးနှင့် စိတ်ကိုပြောင်းလဲစေသော ဆေးဝါးများဆိုင်ရာ ဥပဒေတို့နဲ့ အရေးယူထားတယ်လို့ သိရပါတယ်။
၎င်းတို့ကို လတ်တလော ပြဋ္ဌာန်းချက်များ အက်ဥပဒေ ပုဒ်မ ၃(၁)/၁၃(၁)၊ မူးယစ်ဆေးဝါးနှင့် စိတ်ကိုပြောင်းလဲစေသော ဆေးဝါးများဆိုင်ရာ ဥပဒေတို့အရ အပြစ်ပေးအရေးယူထားကြောင်း အာဏာသိမ်းအစိုးရက ထုတ်ပြန်ထားတာ ဖြစ်ပါတယ်။
မြဝတီဒေသမှာ ၂၀၂၅ ခုနှစ် ဇန်နဝါရီ ၃၀ ရက်ကနေ ယခုနှစ် မေလ ၁၉ ရက်နေ့အထိ တရားမဝင် ဝင်ရောက်လာသူ နိုင်ငံခြားသား ၁၄,၆၅၈ ဦး ဖမ်းမိခဲ့ပြီး၊ အဲဒီအထဲက ၁၃,၄၄၃ ဦးကို ထိုင်းနိုင်ငံကတဆင့် သက်ဆိုင်ရာ နိုင်ငံတွေထံ ပြန်လည်လွှဲပြောင်းပေးခဲ့တယ်လို့ ဖော်ပြထားပါတယ်။
လွှဲပြောင်းပေးဖို့ ကျန်ရှိနေတဲ့ ၁,၂၁၅ ဦးထဲက ၇၆၆ ဦးကို အပြစ်ပေးအရေးယူထားပြီးဖြစ်ရာ ကျန်ရှိတဲ့ ၄၄၉ ဦးကိုလည်း သက်ဆိုင်ရာ နိုင်ငံတွေထံ လွှဲပြောင်းပေးဖို့ အသင့်ဖြစ်နေပြီလို့ ဆိုပါတယ်။
၎င်းတို့ ဖမ်းဆီးထိန်းသိမ်းထားသူတွေအနက် ဖိလစ်ပိုင်နိုင်ငံသား ၅ ဦး၊ ဘူရွန်ဒီနိုင်ငံသား ၅ ဦး၊ ကင်ညာနိုင်ငံသား ၅ ဦး၊ ယူဂန်ဒါနိုင်ငံသား ၃ ဦးနဲ့ သီရိလင်္ကာနိုင်ငံသား ၃ ဦး စုစုပေါင်း ၂၁ ဦးကိုလည်း မနေ့က မြန်မာ-ထိုင်း အမှတ်(၂) ချစ်ကြည်ရေးတံတားကတဆင့် သက်ဆိုင်ရာနိုင်ငံတွေထံ လွှဲပြောင်းပေးခဲ့ပါတယ်။
အာဏာသိမ်းအစိုးရအနေနဲ့ အွန်လိုင်းငွေလိမ်ဂိုဏ်းတွေ တိုက်ဖျက်ရေး ဥပဒေမူကြမ်းတရပ်ကို ရေးဆွဲထုတ်ပြန်ထားပြီး လာမယ့် ဇွန်လမှာ ပြန်လည်စတင်ကျင်းပမယ့် လွှတ်တော်အစည်းအဝေးတွေမှာ ဥပဒေအဖြစ် အတည်ပြုပြဋ္ဌာန်းနိုင်အောင် ဆောင်ရွက်သွားမယ်လို့ ပြောထားပါတယ်။
Emily
