ကိုဗစ်-၁၉ ရောဂါကြောင့် မတ်လနောက်ဆုံးပတ်ကနေ ခေတ္တပိတ်ထားတဲ့ ကလေး-ဂန့်ဂေါရထားခရီးစဉ်ကို ဇူလိုင် (၇)ရက်ကစပြီး ပြန်လည်ပြေးဆွဲတော့မယ်လို့ တာဝန်ရှိသူများထံမှသတင်းရရှိပါတယ်။
မနက်ဖြန် မနက် ၆း၃၀ အချိန်ကနေ ၅တွဲပါတဲ့ ရထားဟာ ကလေးဘူတာမှ ဂန့်ဂေါဘူတာသို့ပြေးဆွဲမှာဖြစ်ပြီး ယင်းရထားဂန့်ဂေါရောက်တဲ့ချိန်မှ ကလေးဘက်သို့ပြန်လည်ပြေးဆွဲမှာဖြစ်ပါတယ်။
ယာဉ်စီးခကတော့ တစ်ယောက် ၁၁၅၀ ကျပ်ဖြစ်ပြီး ရထားတွဲတစ်တွဲတွင် လူ (၂၀)သာထိုင်ခွင့်ပြုမယ်လို့ ကလေးဘူတာရုံတာဝန်ရှိသူတစ်ဦးထံမှသိရပါတယ်။
၎င်းက “ရထားစီးတဲ့သူတို့ Mask တပ်ရပါမယ်။ ပြီးတော့ ထိုင်ခုံတစ်ခုံခြားပြီးတော့ ထိုင်ရပါမယ်” လို့ပြောပါတယ်။
ရထားစီးနှင်သူခရီးသည်တွေတဖြည်းဖြည်းနည်းပါးလာတာကြောင့် အရင်က ကလေး- မွေ့လယ်၊ ကလေး – ဟံသာဝတီ လိုင်းတွေအခုတော့ မရှိတော့ပဲ ကလေး-ဂန့်ဂေါတစ်လိုင်းသာပြေးဆွဲပါတော့တယ်။
ရထားဟာ စောင့်ဆိုင်းတဲ့ချိန်ကြာမြင့်တာရယ်၊ ရထားမြန်နှုန်းနှေးကွေးတာကြောင့် လူတွေက ကားလမ်းကိုသာပိုမိုအသုံးပြုလာကြပါတယ်။
