ချင်းပြည်နယ်၊ မတူပီမြို့နယ်အတွင်း စစ်ကောင်စီတပ်နဲ့ ချင်းကာကွယ်ရေးပူးပေါင်းတပ်ဖွဲ့တို့ ဖေဖော်ဝါရီလမှာ ၆ ရက်အတွင်းတိုက်ပွဲ ၁၅ ကြိမ်တိုက်ပွဲဖြစ်ပွားရာ စစ်ကောင်စီတပ်သား ၄၀ သေဆုံးပြီး ၂၀ ဦးကျော် ထိခိုက်ဒဏ်ရာရရှိတယ်လို့ CDF-Zotung ကထုတ်ပြန်ထားပါတယ်။
၎င်းတို့ထုတ်ပြန်ချက်စာထဲတွင် ၂၀၂၃ ခုနှစ်၊ ဖေဖော်ဝါရီလတွင် ချင်းပြည်နယ်၊ ဇိုတုန်နယ်သို့ စစ်ကြောင်းထိုးလာသော အကြမ်းဖက်စစ်ကောင်ကောင်စီအင်အား (၁၅၀)ခန့် နှင့် မိမိတို့ပူးပေါင်းတပ်ဖွဲ့များဖြစ်သည့် Chinland Defence Force -Zotung, Chinland Defence Force – Zophei, Chinland Defence Force – Lautu, Chinland Defence Force – Mara, Chinland Defence Force – Senthang နှင့် ချင်းအမျိုးသားတပ်မတော် (CNA) တို့ကြား (၆) ရက်အတွင်း တိုက်ပွဲပေါင်း (၁၅) ကြိမ်အထိ ပြင်းထန်စွာဖြစ်ပွားခဲ့ပါသည်။ ထိုတိုက်ပွဲတွင် အကြမ်းဖက်စစ်ကောင်စီ တပ်ဖွဲ့ဝင် (၄၀) ဦးနှင့်အထက် သေဆုံးပြီး (၂၀) ဦးနှင့်အထက် ဒဏ်ရာပြင်းထန်စွာရရှိခဲ့ကြသည်။ ထို့အပြင် မိမိတို့ Chinland Defence Force -Zotung မှ တပ်ဖွဲ့ဝင် (၂) ဦးနှင့် Chin National Army (CNA) မှ တပ်ဖွဲ့ဝင် (၁) ဦးတို့သည် စစ်အာဏာရှင်စနစ် အမြစ်ပြတ်ချေမှုန်းရေးနှင့် ဖယ်ဒရယ်ဒီမိုကရေစီနိုင်ငံတော်တည်ဆောက်ရေးအတွက် မြင့်မြတ်စွာကျဆုံးကြသည်။ ဤကဲ့သို့ အသက်ပေးလှူကြသည့် တပ်ဖွဲ့ဝင် (၃)ဦး၏ ကျန်ရစ်သူမိသားစုဝင်များနှင့် ထပ်တူဝမ်းနည်းပြီး ဤ ကျဆုံးတပ်ဖွဲ့ဝင်များအား အာဇာနည်သူရဲကောင်းများအနေဖြင့် မှတ်တမ်းတင် ဂုဏ်ပြုအပ်ပါသည်လို့ဖော်ပြထားပါတယ်။
