ဘုရားကျောင်းထဲမှာ ရက်သားအရွယ်ကလေးတစ်ယောက် လာရောက်စွန့်ပစ်
တီးတိန်မြို့ Lawibual ရပ်ကွက် Lawibual နှစ်ခြင်းဘုရားကျောင်းထဲမှာ ရက်သားအရွယ်ကလေးတစ်ယောက် လာရောက်စွန့်ပစ်ထားတာကို မနက်ပိုင်းဘုရားကျောင်းမှာဆုတောင်းတဲ့အမျိုးသမီး တစ်ဦးက တွေ့ရှိကြောင်း သတင်းရရှိပါတယ်။
Lawibual ရပ်ကွက်အုပ်ချုပ်ရေးမှူး ဦးဝုန်ကျင်က “ဒီမနက် ၅ နာရီလောက်က ဘုရားကျောင်းမှာ ဆုလာတောင်းတဲ့ အမျိုးသမီးက ဘုရားပုလ္လုင်ပေါ်မှာ ကလေးတစ်ယောက်တွေ့တယ်။ ကြည့်ရတာ ကလေးက မွေးထားတာ ၂ ရက် ၃ ရက်လောက်ပဲကြာအုံးမယ်။ ကလေးကို စောင်အထူကြီးနဲ့လည်းမပတ်ထားဘူး။ အနှီးပုံစံနဲ့ပဲပတ်ထားတယ်။ ဒီအကြောင်းကို သိတဲ့ မြို့ထဲက ကလေးမမွေးနိုင်တဲ့လင်မယားက ရင်သွေးသမီးအဖြစ်စောင့်ရှောက်မယ်လို့ ဘာသာရေးခေါင်းဆောင်တွေရှေ့မှာတောင်းတာကြောင့် သူတို့ကမွေးထားလိုက်ပြီ။ သူတို့လင်မယားက အတူတူပေါင်းသင်းလာတာ ၁၀ နှစ်ကျော်ပြီ။ ကလေးတော့မရနိုင်ဘူး။ ကလေးလိုချင်လွန်းလို့ မန္တလေးထိ ကလေးမွေးစားဖို့ရှာကြတယ်။ ဒါပေမယ့်မတွေ့ဘူး” လို့ပြောပါတယ်။
