ဟားခါး-ဖလမ်းလမ်းကြား ကျောက်တုံးပြိုကျ၍ ကားများပိတ်သဖြင့် မိုင်းခွဲရန်စီစဉ်နေ
ဟားခါးမြို့နယ် ချွန်ကျူံးရွာအနီးမှာ ဟားခါး-ကလေးကားလမ်းမပေါ်တွင် ကျောက်တုံးများပြိုကျတာကြောင့် ကားလမ်းပိတ်သဖြင့် မိုင်းခွဲရန်စီစဉ်နေတယ်လို့ ခရီးသည်တွေဆီမှသတင်းရရှိပါတယ်။
ကျောက်တုံးပြိုကျတဲ့နေရာက ဟားခါး နဲ့ ချွန်ကျူံးအကြား စတော်ဘယ်ရီခြံအနီးတွင်ဖြစ်ပြီး ယမန်နေ့ကတည်းက စပြီး အနည်းငယ်ပြိုကျနေပြီလို့သိရပါတယ်။
ဟားခါးမှဖလမ်းမြို့သို့သွားမယ့်ခရီးသည်တစ်ဦးက “ကျနော်တို့ကားရောက်သွားတာက မနက် ၉ နာရီကျော်ကျော်ဖြစ်မယ်။ ကားလမ်းပိတ်တာက မနက်ကတည်းပါ။ စက်ကြီးတစ်စီးတော့ရှိတယ်။ ဒါပေမယ့် ကျောက်တုံးက အရမ်းကြီးတယ်။ ဒါကြောင့် မိုင်းခွဲဖို့ ကျောက်ကိုအပေါက်ဖောက်နေကြတယ်။ ကားတော့သွားလို့မရဘူး။ လမ်းဘေးလည်းမြေသားပျော့တော့ စိတ်မချရဘူး။ ဆိုင်ကယ်ပဲဖြတ်သွားခွင့်ပြုတယ်” လို့ပြောပါတယ်။
ဟားခါးမှ ကလေးမြို့ဘက်သို့ဆင်းမယ့် ကား အစီး ၂၀ ကျော်ပိတ်မိနေပါပြီ။
