ကလေးမြို့မှာ သဲတင်ကားက မီးအားမြှင့်စက်တိုက်မိလို့ ယာဉ်နောက်လိုက်သေဆုံး
ကလေးမြို့၊ အင်ဒိုင်းကုန်းရပ်ကွက် ဈေးအနီးရှိ မီးအားမြှင့်စက်ကို သဲတင်ကားတစ်စီးက ဒီမနက် (၁၀း၃၀)နာရီခန့်မှာ တိုက်မိလို့ ယာဉ်နောက်လိုက်တစ်ဦးသေဆုံးပြီး ယာဉ်မောင်းထွက်ပြေးနေပါတယ်။
ဖြစ်စဉ်မှာ ယာဉ်မောင်း ဦးရှင်ပီး(ထွက်ပြေး)မောင်းနှင်လာတဲ့ ကားနံပါတ် MDY- 2P-9707 ဟာ အင်ဒိုင်းကုန်းရပ်ကွက် နယ်မြေ(၆) ပြည်တော်သာလမ်းဘေးရှိ မီးအားမြှင့်စက် 200KVA ကို ဝင်တိုက်မိလို့ ဓာတ်တိုင်သုံးတိုင်ကျိုးပြီး မီးအားမြှင့်စက်တစ်လုံးပျက်စီးသွားပါတယ်။ ယာဉ်မောင် ဦးရှင်ပီးဟာ အခင်းဖြစ်ပွားပြီးနောက်ထွက်ပြေးသွားပြီး ယာဉ်နောက်လိုက် ဦးစူးစံ( အသက် ၂၀ ခန့်)မှာ ဒဏ်ရာပြင်းထန်သဖြင့် ကလေးမြို့ပြည်သူ့ဆေးရုံသို့ပို့ဆောင်ပြီးနောက် သေဆုံးသွားပါတယ်။
ယာဉ်ပိုင်ရှင်မှာ ကလေးမြို့ ချမ်းမြှင့်အောင်စည်ရပ်ကွက်နေ ဦးခိုင်လမ့်ထန်ဖြစ်ပါတယ်။
အင်ဒိုင်းကုန်းရပ်ကွက်အုပ်ချုပ်ရေးမှူး ဦးပက်တလွန်က “အခု မြို့နယ်လျှပ်စစ်တာဝန်ရှိတဲ့သူတွေနဲ့ ယာဉ်ပိုင်ရှင်တွေ အုပ်ချုပ်ရေးရုံးမှာတွေ့ဆုံနေတယ်။ စက်ဘယ်လောက်ပျက်စီးတယ်ဆိုတာအရင်စစ်ဆေးပြီးမှာ ဘယ်လိုအရေးယူမလဲဆိုတာ ထွက်လာမယ်”လို့ပြောပါတယ်။
