ချင်းပြည်နယ်ရဲ့ ပထမဆုံး ကြယ် ၄ ပွင့်အဆင့်ရှိ ဟိုတယ် (၃)လုံးကို ဟားခါးမြို့တွင် တည်ဆောက်ဖို့ ကုမ္ပဏီနဲ့ အစိုးရကြား နားလည်မှုစာချွန်လွှာရေးထိုးလိုက်ပြီလို့သတင်းရရှိပါတယ်။
ဟိုတယ်တည်ဆောက်မယ့် ကုမ္ပဏီတွေကတော့ King Solomon၊ KL Amazing၊ ချမ်းသာရွှေမြေ၊ နဲ့ အောင်ကံသာကုမ္ပဏီ စသည်တို့ဖြစ်ပါတယ်။ King Solomon နဲ့ KL Amazing ကုမ္ပဏီတို့ဟာ ချင်းတိုင်းရင်းသားများ ဦးစီးဆောင်ရွက်တဲ့ကုမ္ပဏီတွေဖြစ်ပြီး အောင်ကံသာကုမ္ပဏီမှာဟားခါးအခြေချ ဝန်ထမ်းတွေဦးစီးထားတဲ့ ကုမ္ပဏီဖြစ်တယ်လို့ ဝန်ကြီး ဦးစိုးထက်ကဆိုပါတယ်။ ချမ်းသာရွှေမြေကုမ္ပဏီကတော့ မန္တလေးအခြေစိုက် ဖြစ်ပါတယ်။
ဒီကိစ္စနဲ့ ပတ်သက်ပြီး ချင်းပြည်နယ် စည်ပင်ဝန်ကြီး ဦးစိုးထက်က “သူတို့က မိုးကုန်ရင်စဆောက်မယ်။ အခု မြေပုံစံ ၁၀၅/၁၀၆ ရေးဆွဲဖို့ မြို့ပြစီမံကိန်းကော်မတီကနေလုပ်ဖို့ အဲ့မြေကိစ္စလေးတွေရှိတယ်။ အဲ့ဒါပြီးရင် စဆောက်မှာပေါ့နော်။ တစ်ချို့က တစ်နှစ်အတွင်းအပြီးဆောက်ဖို့ စီမံကိန်းတင်တာရှိတယ်။ တစ်ချို့က နှစ်နှစ်ကြာမယ်ပေါ့။ ဟိုတယ်တစ်လုံးကို ၄ ဧက နဲ့ ၅ ဧကကြား ပေးထားတယ်။ ရင်းနှီးမြှုပ်နှံမှုတန်ဖိုးကတော့ တစ်ချို့ဟိုတယ်က တစ်လုံးကို သိန်း သုံးသောင်းလောက်ရင်းမယ်။ နောက်တစ်ခုက သိန်း ၄၅၀၀၀ လောက်ရင်းမယ်လို့ပြောတယ်” လို့ဆိုပါတယ်။
ဟိုတယ်တည်ဆောက်မယ့် နေရာကတော့ ဂေါက်ကွင်းနဲ့ ကောလိပ်အကြားနဲ့ အချို့ မြို့ပြစီမံကိန်း ဧရိယာတွင်တည်ဆောက်မှာဖြစ်တယ်။
