ဒီဇင်ဘာ၊ ၁၉ရက်၊ ၂၀၂၅။
Zalen
စစ်ကိုင်းတိုင်း၊ တမူးမြို့မှာ ဗုံးပေါက်ကွဲမှုတစ်ခု ဖြစ်ပွားလို့ ခရစ္စယာန်ပါစတာ တစ်ပါးနဲ့ အမျိုးသမီး ၂ဦး ထိခိုက်ဒါဏ်ရာရရှိခဲ့တယ်လို့ ဒေသခံများဆီကသိရပါတယ်။
ယနေ့ဒီဇင်ဘာ ၁၉ရက်နေ့ ညနေ ၂နာရီခွဲခန့် မှာ တမူးမြို့ စည်ပင်ရုံးအနီးမှာ ဗုံးတစ်လုံးပေါက်ကွဲခဲ့ပြီး ခရစ္စယာန်ပါစတာတစ်ပါးနဲ့ အမျိုးသမီး ၂ဦး အခုလိုထိခိုက်ဒါဏ်ရာရရှိခဲ့တာဖြစ်ပါတယ်။
” ဗုံးကွဲတာ ၂နာရီခွဲလောက်ကနေမယ်။ ပါစတာတစ်ပါးနဲ့ လမ်းသွားလမ်းလာ အမျိုးသမီး ၂ယောက်ထိတယ်။ ပါစတာကပေါင်မှာ ထိတာလို့ပြောတယ်။ ဘယ်အဖွဲ့ကထောင်ထားတယ်ဆိုတာတော့ မသိရသေးဘူး” လို့ တမူးမြို့ခံတစ်ဦးက Zalen ကိုပြောပါတယ်။
စစ်ကောင်စီကပြုလုပ်မယ့် ရွေးကောက်ပွဲနီးနေတဲ့အချိန်မှာ အခုလိုတမူးမြို့မှာ ဗုံးပေါက်ကွဲမှု မကြာခဏဖြစ်ပွားနေတာကြောင့် မဲရုံသွားပြီး မဲပေးမယ့်သူတွေအတွက် လုံခြုံမှုမရှိနိုင်ဘူးလို့ ဒေသခံအချို့က ပြောဆိုနေကြပါတယ်။
ပြီးခဲ့တဲ့ နိုဝင်ဘာလ ၂၇က်နေ့နဲ့ ဒီဇင်ဘာလ ၁ရက်နေ့မှာလည်း တမူးမြို့မှာ ဗုံးပေါက်ကွဲမှု ဖြစ်ပွားခဲ့ပြီးနောက် ရွေးကောက်ပွဲနီးပြုလုပ်ဖို့ တစ်ပတ်ကျော်အလိုမှာ အခုလို ဗုံးပေါက်ကွဲမှုထပ်မံဖြစ်ပွားခဲ့တာဖြစ်ပါတယ်။
သတင်း – တမူးနွေဦး
ဓာတ်ပုံ – လူမှုကွန်ယက်
