ချင်းပြည်နယ်၊ ပလက်ဝမြို့နယ်၊ ဆမီးမြို့ရှိ ကျီးဝအုပ်စု၊ ကြက်မအိုင်ကျေးရွာများက ချင်းလူငယ် အသက် (၁၈)နှစ်မှ (၂၅)နှစ် လူငယ်များကို ဖေဖော်ဝါရီလ ၁ ရက်နေ့စပြီး ရက္ခိုင့်တပ်တော်(AA)က အခြေခံစစ်ပညာ အတင်းတက်ခိုင်းကြောင်း သိရှိရသည်။
“အခြေစစ်ပညာကို ကျေးရွာတစ်ရွာမှာ ၁ ဦး မှ ၂ ဦးနှုန်း တက်ရောက်ခိုင်းပါတယ်။ သင်တန်းဆင်း ချင်းလူငယ်များကို မိမိနေရပ်သို့ပြန်ခွင့်ပြုသော်လည်း ခရီးသွားလာခွင့်မပေးဘဲ ကန့်သတ်ထားပါတယ်” ဟု ဒေသခံ တစ်ဦးက ပြောဆိုသည်။
ဆက်လက်ပြီး ဒေသခံတစ်ဦးက “ရွာကြီးရင် ၂ ယောက် ရွာသေးရင် တစေ်ယာက် ရွာတိုင်းအဲ့လို့စုခိုင်းပြီး အေအေ ထိန်းချုပ်နယ်မှာ သင်တန်းတက်ခိုင်းတာပါ။ သင်တန်းက ၁၅ ရက် ကြာတယ်။ လိုအပ်ရင် AA က စစ်တိုက်ဖို့ အခုလည်း အတင်းအဓမ္မတက်ခိုင်းတာ သင်တန်းဆင်းပြီးရင် အရံတပ်သားအဖြစ်ထားတယ်။ ရန်ကုန်၊မန်းလေး၊နိုင်ငံခြားသွားလို့မရဘူး။ ရွာမှာ မျက်ခြေမပြတ်စောင့်ကြည့်ခံရတယ်” ဟုပြောပါသည်။
ပြီးခဲ့တဲ့အပတ်က ဆမီးမြို့ပေါ်ရပ်ကွက်များကိုလည်း ရက္ခိုင့်တပ်တော် (AA)က တစ်အိမ်တဆင့်ဖြင့် အိမ်ထောင်စုစာရင်းများ၊ မှတ်ပုံတင်များလည်း လာရောက်ကောက်ခံကြောင်းလည်း သိရှိရသည်။
“အကြောင်းမကြားဘဲ လူ ၃ ယောက်လောက်လာပြီး အိမ်ထောင်စု၊ မှတ်ပုံတင်တွေ လာစစ်သွားတယ်၊ ကျွန်တော်တို့က ဘယ်အဖွဲ့စည်းကစစ်တာလဲ၊ ဘာအတွက်စစ်တာလဲဆိုတာ မသိခဲ့ရဘူး၊ နောက်မှ ရက္ခိုင့်တပ်တော်(AA) အဖွဲ့ဆိုတာ သိရတယ်”ဟု ဆမီးမြို့ခံ တစ်ဦးက ဆိုသည်။
ဆမီးမြို့ပေါ်တွင် ဆမီးဗျူဟာမှူးလည်းရှိပြီး CDF ပလက်ဝနဲ့ စစ်ကောင်စီတို့ မကြာခဏ တိုက်ပဲဖြစ်ပွားသည့်အတွက် စစ်အင်အားလည်း တိုးမြင့်လျှက်ရှိသည်။
