ဇန်နဝါရီလ ၃၀ရက်၊ ၂၀၂၅
Zalen
ချင်းပြည်နယ်၊ မတူပီမြို့မှာ ဇန်နဝါရီလ ၂၄ ရက်တွင် စစ်ကောင်စီတပ်က လေကြောင်းဖြင့် ဗုံကြဲတိုက်ခိုက်ပြီးနောက် ချင်းကာကွယ်ရေးတပ် (မတူပီ) တပ်မဟာ ၁ က ကားလမ်းတွေပြန်ပိတ်လိုက်တယ်လို့ ဒေသခံတွေဆီက သိရပါတယ်။
“ပြည်ထောင်စုလမ်းတွေ၊ မြို့အဝင်အထွက် လမ်းတွေပြန်ပိတ်လိုက်ပြီ။ တချို့က မြို့ထဲသွားကျတဲ့သူတွေ ပိတ်မိနေတာရှိသလို နယ်ပြန်သွားတဲ့သူတွေလည်း ပြန်လာမရဘဲ ပိတ်မိနေတာရှိတယ်။”လို့ မတူပီဒေသခံတစ်ဦးက ပြောပါတယ်။
ပြည်ထောင်စုလမ်းမတွေအပါအဝင် မတူပီမြို့အဝင်အထွက် ကားလမ်းအားလုံးကို ပြီးခဲ့တဲ့ ဇန်နဝါရီလ ပထမအပတ်ထဲက CDF-Matupi တပ်မဟာ ၁ က ပြန်လည်ဖွင့်ပေးပေမဲ့ အခုအခါမှာ ပြန်လည်ပိတ်လိုက်တာဖြစ်ပါတယ်။
ပြီးခဲ့တဲ့ ဇန်နဝါရီလ ၂၄ ရက်နေ့ညက မတူပီမြို့မှာ စစ်ကောင်စီတပ်က လေကြောင်း ဗုံးကြဲတိုက်ခိုက်ခဲ့လို့ အာရက္ခတပ်တော် (အေအေ) စစ်ရေးရုံးအပြင် အရပ်သား ဆေးဆိုင်၊ စျေးဆိုင်တွေနဲ့ နေအိမ်တွေ ထိခိုက်ပျက်စီးသွားပါတယ်။
ဒါ့အပြင် စစ်ကောင်စီတပ်ဟာ မတူပီမြို့ကို တစ်နှစ်နီးပါး လက်လွတ်လိုက်ရပေမဲ့ အခုရက်ပိုင်း မတူပီမြို့နဲ့အနီးအနားဝန်းကျင်မှာ လေကြောင်းကနေ ကင်းထောက်လေယာဥ်တွေနဲ့ စောင့်ကြည့်မူတွေ ပြုလုပ်နေတယ်လို့ သိရပါတယ်။
“ကင်းထောက်လေယာဥ်တွေက အမြဲတမ်း လာတယ်။ ဒီလထဲမှာတင် လေးကြိမ်လောက် ဗုံးကြဲသွားပြီး။ အရပ်သားတွေထိခိုက်မှုမရှိပေမဲ့ နေအိမ်တွေပျက်စီးတွေက ရှိတယ်။ ပြည်သူတွေက စိုးရိမ်တာပေါ့။”လို့ ဒေသခံတစ်ဦးက ပြောပါတယ်။
မတူပီမြို့သိမ်းတိုက်ပွဲတွင်း ထွက်ပြေးတိမ်းရှောင်နေကြတဲ့ စစ်ဘေးရှောင်တွေလည်း မတူပီမြို့ထဲ ပြန်လာကြသူတွေရှိပြီး နောက်ထပ် နေရပ်ပြန်လာမယ့် စစ်ဘေးရှောင်တွေလည်း ပြင်ဆင်ဆောင်ရွက်နေကြတယ်လို့ သိရပါတယ်။
မတူပီမြို့ကို ချင်းညီနောင်နဲ့ မဟာမိတ်ပူးပေါင်းတပ်ဖွဲ့တို့က ၂၀၂၄ ခုနှစ်၊ ဇွန်လ ၂၉ ရက်နေ့မှာ သိမ်းပိုက်ရရှိပါတယ်။
သတင်း – ခူမီး
