မတူပီမြို့အနီး ကားတစ်စီးချောက်ထဲကျလို့ တစ်ဦးသေ၊ သုံးဦးဒဏ်ရာရ
ချင်းပြည်နယ် မတူပီမြို့အနီး ၃ မိုင်အကွာ ပလက်ဝသွားတဲ့လမ်းမှာ ဒီနေ့ ၂ နာရီကျော်တွင် ကျောက်သယ်ကားတစ်စီး ချောက်ထဲထိုးကျလို့ တစ်ဦးသေဆုံးပြီး ၃ ဦးဒဏ်ရာရရှိသွားတယ်လို့သတင်းရရှိပါတယ်။
ဖြစ်စဉ်နဲ့ပတ်သက်ပြီး အခင်းဖြစ်ပွားတဲ့နေရာသို့ သွားရောက်ကူညီခဲ့တဲ့ ချင်းလူငယ်အဖွဲ့အစည်း (မတူပီ)မှအကြံပေး ဆလိုင်းနိုဘိတ်က “ကားမှောက်တဲ့နေရာက အဆင်းကြမ်းသလို လမ်းကွေ့လည်းရှိတယ်။ ကွန်ကရစ်လမ်းလည်ဖြစ်တယ်။ လမ်းရဲ့ ဘယ်ဘက်ချောက်ထဲ ပေ ၄၀၀ လောက်အနက်မှာကျသွားတာ။ ကားက ဆောက်လုပ်ရေးကား။ သေသွားတဲ့သူက လမ်းအလုပ်သမား၊ မင်းလှမြို့နယ်ဘက်ကလို့ကြားတယ်။ အသက် ၄၀ ဝန်းကျင်လောက်ဖြစ်မယ်။ သူက တစ်ကိုယ်လုံးမှာ ဒဏ်ရာရှိတယ်။ အဲ့မှာ အသက် ၆၀ ဝန်းကျင် အမျိုးသမီးတစ်ယောက်လည်းပါတယ်။ သူကတော့ ခြေထောက်မှာဒဏ်ရာရတယ်။ ကားဆရာ ထန်းမော၊ သူက ဘယ်ဘက်လက်ကျိုးသွားတယ်၊ ပြီးတော့ နောက်ကြောမှာလည်း ဒဏ်ရာရတယ်။ ယာဉ်နောက်လိုက်က အသက် ၂၀ လောက်ဖြစ်မယ်။ သူလည်း ဒဏ်ရာနဲ့။ သူတို့အားလုံးက အခု မတူပီပြည်သူ့ဆေးရုံမှာ ဆေးကုသနေကြတယ်။ အခုကားမှောက်တဲ့အနီးမှာ အရင် ၂ လလောက်က ကားတစ်စီး လမ်းပေါ်မှာမှောက်လို့ ကလေးတစ်ယောက်သေဖူးတယ်” လို့ပြောပါတယ်။
