ရခိုင်ပြည်နယ်တွင် ချင်းအမျိုးသားတစ်ဦး နေအိမ်တွင်အသတ်ခံရ
ရခိုင်ပြည်နယ် အမ်းမြို့နယ် မဲလောက်မောင်းရွာမှာနေထိုင်တဲ့ ဦးခိုင်(၃၉ နှစ်)ဟာ ၎င်းနေအိမ်တွင် အမည်မသိ လူ ၄ ဦးက စက်တင်ဘာ ၉ ရက် ည ၁၁ နာရီခန့်တွင် ဓားနဲ့ထိုးသတ်ခံရတယ်လို့ ကျေးရွာအုပ်ချုပ်ရေးမှူးထံမှသတင်းရရှိပါတယ်။
မဲလောက်မောင်းကျေးရွာဟာ ရန်ကုန် – စစ်တွေကားလမ်းမဘေးတွင်တည်ရှိပြီး ချင်းအများစုနဲ့ ရခိုင်အနည်းငယ်နေထိုင်ကြတဲ့ရွာဖြစ်ပါတယ်။
မဲလောက်မောင်းအုပ်စုအုပ်ချုပ်ရေးမှူး ဦးဝေလင်းက “ဦးခိုင်က လယ်ယာစိုက်ခင်းပဲလုပ်ကိုင်တဲ့သူပါ။ သူ့မှာ ၂ နှစ်အရွယ်သမီးတစ်ယောက်ရှိပါတယ်။ သူ့အလောင်းကို ဒီနေ့ညနေ မြေမြုပ်သဂြိုလ်မယ်။ မနေ့က သူ့အမျိုးသမီးက ရဲစခန်းမှာ အမှုဖွင့်ထားပြီ။ ဘယ်သူကသတ်တာလဲဆိုတာမပြောတတ်ဘူး။ အခုရွာကလူတွေအားလုံးကြောက်လန့်နေကြတယ်” လို့ပြောပါတယ်။
ရခိုင်ပြည်နယ် စစ်တွေအခြေစိုက် DMG သတင်းက ဦးခိုင်ရဲ့ ဇနီးဒေါ်ခင်ရီသန်းက အမည်မသိလူ ၄ ဦးက ဓားနဲ့အချက်ပေါင်းများစွာထိုးသတ်သွားတယ်လို့ဖော်ပြထားပါတယ်။
