နှစ်ဖက်တိုက်ပွဲပြင်းထန်လို့ ပလက်ဝမြို့ပေါ်မှာ လူ ၂၀၀ ဝန်းကျင်စစ်ဘေးရှောင်လာ
ပလက်ဝမြို့ရဲ့အထက် ၇ မိုင်ခန့်အကွာမှာ တပ်မတော်နဲ့ အေအေတပ်ဖွဲ့တို့ လက်နက်ကြီးတွေနဲ့ပစ်ကြတာကြောင့် အနီးနားရှိ ကျေးရွာ (၃)ရွာမှာ ပြည်သူတွေ ပလက်ဝမြို့ပေါ်မှာ ဒီနေ့ တိမ်းရှောင်လာကြပါတယ်။
ဇွန်လ (၇)ရက် ညနေ ၅ နာရီခန့်တွင် ပလက်ဝမြို့နဲ့ ၇ မိုင်ဝန်းကျင်အကွာ သဲမချောင်းထဲရွာ၊ သဲမချောင်းဝရွာ နဲ့ ပိနဲ္နတပင်ရွာ အနီးတဝိုက်မှာ တပ်မတော်နဲ့ အေအေတပ်ဖွဲ့တို့ တိုက်ပွဲဖြစ်ပွားခဲ့တယ်။ ဒါကြောင့် ဇွန်လ (၈) ရက် နံနက် ၁၁ နာရီခန့်တွင် ပလက်ဝမှ တပ်စခန်းမှ လက်နက်ကြီးတွေနဲ့ ပစ်တာကြောင့် သဲမချောင်းဝရွာ အနီး ရွာတစ်ဖက်ကမ်းတွင် လက်နက်ကြီးကျည်ဆန်ကျခဲ့လို့ ဒေသခံပြည်သူတွေ အသက်အန္တရာယ်စိုးရိမ်တာကြောင့် ဒီနေ့ ၁၂ နာရီခန့်တွင် ပလက်ဝမြို့သို့ထွက်ပြေးလာကြပါတယ်။
ပလက်ဝမြို့ ဒေသခံတစ်ဦးက “ပလက်ဝ တပ်စခန်းကနေ ဒီနေ့ လက်နက်ကြီး ဘယ်နလုံးလောက်ထုတာလဲဆိုတာ မရည်တွက်နိုင်တော့ဘူး။ ခုတလောတော့ နေ့တိုင်း လက်နက်ကြီးသံကြားရတယ်။ စစ်ဘေးရှောင်တွေကတော့ ဒီညတော့ အသိမိတ်ဆွေအိမ်တွေမှာ ခိုလုံကြတယ်။ မနက်ဖြန် မနက်ပိုင်းမှာ လူပြန်စုပြီး တစ်နေရာမှာ နေရာချထားဖို့ စီစဉ်မယ်” လို့ပြောပါတယ်။
